Baxo’l llema “Lluchar pol presente pa tener Futuru” los trabayaores d’ArcelorMittal desixeron al presidente la so implicación nel conflictu
Ayeri a les 11:30 la plantía d’Arcelor Mittal movilizóse con una concentración delantre la Xunta Xeneral del “Principado”, escontra los planes de la multinacional de retayar alrodiu los 1.000 puestos de trabayu.
La intención d’esta movilización yera obligar al “Principado” a escuchar les sos revindicaciones, basicamente, que nun se cargue sobro los trabayaores una “descarbonización” mal planificada ya ensin alternatives. En concreto desixen que s’apare’l desaniciu d’emplegu, que fine la precarización de los eventuales y se garantice la continuidá del contratu relevu 60-61.
Pa ello fueron a les puertes mesmes de la Xunta Xeneral, bien reconocibles gracies a la ropa de trabayu de la empresa, acompangaos de gaiteros y tamboriteros, botes de fumo y muncha brenga pa facese notar y que nun puedan finxir que nun se decaten de la so presencia.
Los trabayaores reclamaron a Adrián Barbón un sofitu políticu que se yos prometió y qu’enxamás nun llega. “Defender el Contratu Relevu y un procesu de Descarbonización xustu ye xera de toos… poro los que nos gobiernen tuvieron qu’escuchanos, seique nun-yos gustare muncho” declaraben dende CSI-ArcelorMittal.
This work is licensed under a Creative Commons Attribution 4.0 International License.
