Los sindicatos consideren un fraude de llei a ocupación de places permanentes con personal interín
Demientres el conceyu de la Mesa Técnica na que participaron los sindicatos d’enseñantes con representación na Mesa Sectorial d’Educación, la Conseyería d’Educación y Función Pública, SUATEA plantegó a l’Alministración dos entrugues clave coles qu’esclariar les irregularidaes que lleven denunciando añu tres añu: ¿Cuántos puestos de la plantiya orgánica tan ocupaos por personal funcionariu? y ¿Cuántos por personal temporal interín?.
La rempuesta a estes entrugues, 7.817 y 1.411 respeutivamente, costátase lo denunciao pol sindicatu en comunicaos y movilizaciones: l’abusu na contratación de personal interín pa cubrir puestos de ñatura de cadarma de la plantiya orgánica, que desempeñen funciones propies de profesoráu de carera y que nun se pueden xustificar por razones de necesidá o urxencia, lo que costitúi un fraude de llei. Esi ye’l motivu pol que SUATEA desixe la consolidación del profesoráu interín, por drechos alquirios y como resarcimientu pol abusu cometíu cola escesiva temporalidá na so contratación, plantegando’l concursu de méritos.
Ello, que fasta agora yera llegalmente inviable, vien facilitao pola Llei 20/2021, de 28 d’avientu de midíes urxentes pa l’amenorgamientu de la temporalidá nel sector públicu. D’aplicase correchamente esta midía, la educación asturiana cuntaría con plantiyes estables y abondes coles qu’ufrir una educación de calidá y poder afrontar los retos educativos futuros.
Redaición InfoAsturies
This work is licensed under a Creative Commons Attribution 4.0 International License.
