• Portada
  • >
  • Cultura
  • >
  • Misiva llancen nuevu videoclip y anuncien conciertu pa festexar 12 años de punk-rock n’asturianu

Misiva llancen nuevu videoclip y anuncien conciertu pa festexar 12 años de punk-rock n’asturianu

  • 8 Marzu, 2022

El 12 de marzu van actuar na sala Gong d’Uviéu nun conciertu mui especial nel que va sonar el so emotivu nuevu cantar “La Misiva”
Misiva ye una de les bandes más destacaes de la escena punk-rock d’Asturies. Cuatro discos al llombu, actuaciones en festivales como’l Resurrection Fest y el Tsunami Xixón, xires xunto a grupos como Desakato… Tres cuasi dos años de parón por culpa’l COVID-19 y yá recuperaos de nun poder cellebrar el so X Aniversariu en 2020, el grupu vuelve a l’actividá con una montonera de novedaes.
La banda ta acabante de publicar “La Misiva”, un cantar con un mensaxe d’optimismu, ilusión y qu’homenaxea a la so trayectoria. El videoclip ta dirixíu pol prestixosu realizador asturianu Titi Muñoz, nél collaboren varios familiares y collacios del grupu -ente ellos componentes de Desakato y Mala Reputación-, y tresmite tola enerxía que lleva acompañando a Misiva per más d’una década. Esta nueva canción, xunto al conciertu quevan dar esti sábadu 12 de marzu na sala Gong d’Uviéu, son parte de les acciones coles que la banda cellebra 12 años de punk-rock n’asturianu. “La Misiva” foi compuesta mientres l’andanciu, ta grabada n’OVNI Estudio con Pablo Martínez (Desakato) y reflexa’l nuevu estáu d’ánimu del grupu, que quier dexar de llau l’atmósfera apocalíptica del so anterior trabayu “L’Últimu Aliendu”.

La canción fala de que pesie a tolos confinamientos y restricciones, pesie a los más de 10 años y que’l tiempu pasa pa toos, Misiva sigue’l so camín cola mesma enerxía de siempre, cola mesma ilusión y ensin
complexos. Musicalmente amuesa un soníu más contundente y novedosu, mientres que gráficamente quixeron apostar xunto al so diseñador “Rubonón” por colores más vivos y elementos más gayoleros.
Concierto X+2 Aniversariu Tres cuasi dos años ensin pisar prácticamente un escenariu por culpa’l Coronavirus, Misiva vuelven actuar esti sábadu 12 de marzu a les 21.30h na sala Gong d’Uviéu. Nesti conciertu X+2 Aniversariu van repasar los sos doce años n’activo y anuncien que va ser una actuación
especial, con delles sorpreses y invitaos. Les entraes pal conciertu -nel que van tar acompañaos de Los Bárcenas- yá se pueden mercar online o en La Bomba Records por un preciu anticipáu de 10 euros.

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies