“Cuando vean que’l cartelu d’avisu ta tamién n’#asturianu, a dalgunu d’estos va da-yos un mal” bromea Inaciu Galán, activista llingüísticu y víctima del acosu de los antiasturianos refiriéndose al cartelu qu’acompanga la recién estrenada cámara de seguridá a la entrada del so estudiu de grabación

Los ataques entamaron de magar les declaraciones del diputáu de la formación ultra española, Ignacio Blanco, citando a Galán na Xunta Xeneral. Nos díes vinientes, la cuenta d’esi diputáu, les del diputáu tamién de Vox José María Figaredo y les d’otres entidaes venceyaes, comu la de VOX Asturies, el Club de los Viernes y la Plataforma contra la Cooficialidad, cuelguen vídeos de la intervención de Blanco y d’intervenciones de Galán en documentales y reportaxes televisivos, desacreditándolu y señalándolu, incluyendo captures de documentación del BOPA onde apaecíen trabayos fechos pola empresa de la que ye alministrador, Cuatro Gotes Producciones.

Al pocu d’estes declaraciones na Xunta Xeneral llancen-y un güevu dende una ventana y la productora Cuatro Gotes alcuentra pegamín na pesllera del estudiu en dos ocasiones, a lo qu’hai que sumar insultos y acosos en redes. De magar esta situación, l’alministrador de Cuatro Gotes presenta denuncia a les fuercies de seguridá, acompangando la mesma con captures y abonda información al respeutu.

Mesmo asina l’acosu continuó y a la estroza de preslleres acompangaron pegadielles de  ‘Coficialidad no. Llingua inventada’ y ‘Pumares traidor, cooficialidad no” nes cercanies al estudiu de Cuatro Gotes, lo que convida a venceyar dambos fechos.

Tres tou ello y temiendo pola integridá de les sos istalaciones, Inaciu Galán vien d’istalar un sistema de seguridá col envís de grabar a los responsables d’estos ataques que tan bien espeyen el calter “democráticu” y “amable” de los contrarios a los drechos llingüísticos de los asturianos.

Llucía F. Marqués

This work is licensed under a Creative Commons Attribution 4.0 International License.