El sábadu 12 de marzu Piloña acoyerá la XXII Nueche en Danza
En marzu de 2015 aniciábase un proyeutu perprestosu, una “Xuntanza de xente pa baillar, tocar y cantar ensin más pretensión que la de pasalo bien”. La idega cuayó y foi a más edición a edición, algamando 20 xuntances de cientos de danzantes revitalizando y dando puxu al baille y Música’l País. La edición 21 foi más abegosa, cola xente en casa ya ensin posibilidá d’axuntase, pero mesmo asina, cellebróse: decenes de vidios de xente ballando en casa anubrieron les redes en virtual cercanía.
Sicasí, nun ye lo mesmo, hai ganes de tornar a vese de cerca y eso ye lo que fae tan especial esta XXII Nueche en Danza, que torna a ser xuntanza. La convocatoria ye el 12 de marzu, a les 22:30 hores na Plaza Xosefa Canellada, en L’Infiestu. Anantes, de magar les ocho la tardi, habrá un taller de Balle’l País con Santi Galguera.
Redaición InfoAsturies
This work is licensed under a Creative Commons Attribution 4.0 International License.
