La versión tornada al español del nuesu periódicu dixital malpenes algamaba l’ún por cientu de les visites diaries

Cuando entamemos a espublizar InfoAsturies, en xineru del añu 2017, anunciemos que, siendo coscientes de la situación de billingüísmu que se vive n’Asturies, considerábemos necesario espublizar les noticies n’asturianu y n’español, col envís de poner al algame de tola población d’Asturies (asturfalante y non) l’actualidá del díi ente díi dende un puntu de vista puramente asturianu.

Con esi porgüeyu llevamos cincu años espublizando toles nueses noticies cola so correspondiente torna. Sicasí, depués d’esti tiempu decatámonos de que’l  99% de los nuesos llectores son asturfalantes, algamando escasamente un ún por cientu de les visites na versión española, polo que a díi de güei anunciamos el preslle d’esa estaya ya InfoAsturies pasará a ser un periódicu dixital escritu esclusivamente n’asturianu.

Redaición InfoAsturies

This work is licensed under a Creative Commons Attribution 4.0 International License.