Como nuna ruleta na que los partíos españoles se xugaren quien fae que ta a favor o a quien-y toca ser el repunante -una ruleta rusa na qu’Asturies siempres pierde- esta vuelta tocó a FORO ser “los malos” d’esta película de tintes traxicómicos con ciertu enclín al drama. Anantes -demientres décades, por ciertu- toco-y al PSOE ser el malu oficial, protagonizando la represión con mayestría y defendiendo un Estatutu que los asturianos nun pudimos decidir, pero Barbón llantóse y quiso ser el mocín, asina que s’aseguró tolo necesario pa que la película fore un ésitu de taquilla: un entamu prometedor, un nuedu llargu chiscáu de suspense equí y allá, un choque violentu al final y un desenllaz intensu, más o menos inesperáu, que dexa abierta la puerte a una segunda parte gloriosa.

Malpenes salimos del cine ya nos llancen el trailer de la siguiente “Reforma l’Estatutu y Oficialidá II”, nun s’escaeza de votar pa seguir viendo. Persabemos que segundes partes nunca foron bones, pero nestos tiempos de series infinites igual hai quien camiente que la trama va camudar si la seguimos viendo unos capítulos más.

Spoiler: non. Los partíos españoles -y españolistes- ye lo que tienen, que son españoles, y nun van puxar por Asturies.