La factura final prevese que xuba a los 3.876 millones, ensin cuntar el costu d’estudios y proyectos, pa una obra qu’atropa 43 años d’hestoria

La circulación en prebes entamó’l pasáu 20 de setiembre, col viaxe inaugural del tren llaboratoriu, nel que nun faltó la presencia de numberoses autoridaes, como la ministra de Tresportes, Raquel Sánchez, el presidentes d’Asturies, Adrián Barbón, ya’l de Castiella y Llión, Alfonso Fernández Mañueco. Sicasí, el términu “tren inaugural” ye confusu, yá que nun implicaba, como erroneamente s’entendió, la prosimidá de l’apertura de la variante: faltaría siquier otru añu pa qu’entamen a circular trenes con normalidá per ella. Nesi plazu de cinco meses, el presupuestu envaloráu medró otros 31 millones d’euros.

Los trabayos de la Variante entamaron en febreru de 2004 y taba previstu que concluyeren en 2010. La nueva infracadarma ta llamada a sustituyir a la rampla de Payares, inaugurada en 1884 y que yá hai 50 años taba considerada “obsoleta”.

El primer documentu que recueye la necesidá d’atopar una alternativa a esa rampla ye de 1979, en tiempos de la UCD y pocu dempués, entamábense los primeros trabayos para estudiar los posibles trazaos. Hai, poro, 43 años d’hestoria tres d’esta obra que, con suerte, vamos ver rematada nel 2023, anque esta seya la enésima fecha de finalización que sentimos. La primera taba prevista para 1989, con un presupuestu d’ente 40.000 y 50.000 millones de les antigües pesetes, unos 270 millones d’euros. L’erru de cálculu foi bultable, 41 años y más de 3.000 millones.

La so entrada en serviciu va dexar encurtiar en 45 minutos el viaxe entre Asturies y Madrid.

Redaición InfoAsturies

This work is licensed under a Creative Commons Attribution 4.0 International License.