La empresa minera responsable del proyeutu Salave, en Tapia, utilizó la prensa asturiana pa espublizar información falsa respeutu al mesmu, denuncien los afectaos pola mina, que fixeron públicu un manifiestu esclariando la so posición y denunciando les falsedaes arramaes nel periódicu El Comerciu
A los vecinos esmolez-yos descomanadamente la calidá de l’agua y l’impautu sobro l’actividá pesquera de la contaminación acuifera, yá que nel proyeutu presentáu prevése un emisariu que vertiría “agües de mina” a 447 metros del cabu del Castello y a unos 375 de los isllotes de Torbas, incluyéndose namás nel plan midíes semestrales de la calidá de l’agua marino na zona, llindándose a envalorar el so impautu por aciu un modelu teóricu sobro un sondéu determinau y favoratible a los sos intereses.
Amás, la empresa da a entender qu’el so procesu d’estración esanicia la necesidá d’utilizar productos cianuraos, daqué que ye aparentemente posible nes primeres fases, pero qu’al llargu plazu sería bien díficil de cumplir, polo que ye previsible la incorporación de los mesmos al procesu.
Finalmente, atopen risible l’afirmación de que “La promotora asegura que la mina en Salave «va amenorgar un 90% l’arsénicu del sosuelu»”. Esto nun significa, como quieren que paeza, un efectu positivu de la esplotación minera, sinón que cenciellamente l’oxetu d’estracción va ser un concentráu de sulfuros metálicos d’arsénicu (el metal más abondoso) y d’oru (el más preciáu), callando’l fechu de qu’al traviés de l’abertura de la esplotación minera, al recuperase’l nivel freáticu tres la so clausura, el terrén supurará grandes cantidaes d’arsénicu llibre mientres dellos sieglos.
“Nun esiste un solu exemplu de minería aurífera caltenible, nin n’Europa nin nel mundu” declaren dende la plataforma. “Ensin dir más allá, en Asturies, repitimos per enésima vegada, tenemos un exemplu llaráu de desastres, incumplimientos y sanciones medioambientales en Belmonte y Salas”.
Xicu Llamazares
This work is licensed under a Creative Commons Attribution 4.0 International License.
