Los problemes de rentabilidá que yá se costataben nel seutor agraváronse esponencialmente cola fuerte xubida de los costos de produción, tantu piensos como lletricidá, abonos o tresportes

El númberu d’esplotaciones de ganadería bovina en Xixón lleva en cayente dende hai dos décades. Los primeros rexistros daten del añu 1998, añu nel que se rexistraron  1.155 esplotaciones ganaderes que se partíen 12.795 cabeces de ganáu. En 2001 costátase por primer vegada una baxada del millar d’esplotaciones, 963, y nes postreres estadístiques publicaes pola Sociedá Asturiana d’Estudios Económicos ya Industriales (Sadei) recuéyense malpenes 412 ganaderíes y 7.558 cabeces.

Amás, l’actual sistema, qu’obliga a amenorgar costos pa que la rentabilidá seya asumible, ta acabando col modelu asturianu d’esplotación familiar en favor de les ganaderíes de mayor tamañu. Ello tampoco ye fácil nun conceyu onde nun hai disponibles finques de gran tamañu, siendo les mayores de dos o trés díes de Güé a lo sumo, lo qu’obliga en dellos casos a movese d’unu allugamientu a otra para trabayar, una y bones los grandes ganaderos parten el so ganáu en dellos allugamientos.

Mientres se confirma esta progresiva desapaición de la ganadería, asturiana polo xeneral y xixonesa en particular, Adrián Barbón sigui negándose a recibir a los ganaderos asturianos para tratar con ellos los problemes del seutor.

Vitor Corte

This work is licensed under a Creative Commons Attribution 4.0 International License.