• Portada
  • >
  • Conceyos
  • >
  • La rebelión de les esnales: el Suroriente tamién esiste

La rebelión de les esnales: el Suroriente tamién esiste

  • 26 Xineru, 2022

Males comunicaciones tantu físiques comu telemátiques, aisllamientu, servicios públicos de tercera, desatención… l’Oriente, y más específicamente’l Suroriente tien razones asgaya p’alzar la voz y reclamar espaciu

L’Ocidente’l país, un de los grandes escaecios de la política asturiana, vien reclamando atención d’un tiempu p’acá, remembrándomos a toos -y mui especialmente a los políticos- qu’Asturies ye más grande que’l cientru más urbanita. L’Oriente garra agora’l testigu y reclama tamién el so sitiu nuna Asturies igualitaria na que toles fasteres cunten colos mesmos privilexos.

“Tamién tamos abandonaos” reclamen los sos alcaldes, refiriéndose a que nun tan meyor que na esnala Ocidental. Los únicos conceyos que “salven” son los que se vendieron a un turismu fagocíticu, que xenera trabayos precarios y problemes de vivienda, finando coles formes de vida tradicionales, pero que yos permite dir tirando. Ye’l casu del triángulu Llanes, Cangues – Cabrales, metanes los qu’Onís, aisllada por 30 argayos y coles carreteres nel arba lo transitable fae equilibrios por caltenese perriba los 700 moraores, menos d’un terciu de los que tenía va un sieglu.

Amieva, otru de los conceyos escaecios, perdió’l 78% de la so población nel caberu sieglu. Aisllamientu, carreteres que ya’l sieglu pasáu reclamaben inversiones que nunca aportaron y falta de servicios lleven al abandonu de la mocedá. Lo mesmo ocurre’n Ponga, onde queden diez rapacinos en tol conceyu y 17 pueblos tan vaciaos; la mayor parte de la población ta xubilao, porque les posibilidaes de topar trabayu ellí lléndense a pocu más que a ser funcionariu; el teletrabayu tampocu ye opción, por mor de la mala cobertoria y no que cinca a servicios un bon exemplu ye l’atención bancaria: la única sucursal del conceyu abre dos hores ca 15 díes, los ponguetos nun son rentables pa la banca… nin pa los partíos, que nun ven provechu n’enfotase nun conceyu tan despobláu.

Peñamellera nun ye la esceición. Siguen los argayos, la falta de servicios, la mala conesión que dexa incluso a bona parte’l conceyu ensin teléfonu, l’ausencia de tresporte públicu… pente les dos Peñamelleres perdieron más de cincu mil moraores nos caberos 100 años, quedando en malpenes 1.700.

Siguiendo l’exemplu del Ocidente, estos conceyos tan entamando a reclamar atención y nun descarten entamar movilizaciones pa visibilizar la so situación.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies