• Portada
  • >
  • Cultura
  • >
  • Los participantes nel Campeonatu d’Echaores indignaos ante la imaxen de la sidre en FITUR

Los participantes nel Campeonatu d’Echaores indignaos ante la imaxen de la sidre en FITUR

  • 21 Xineru, 2022

Son los meyores d’Asturies, que ye lo mesmo que decir los meyores del mundu, echando sidre, y nun comprenden porqué nun se-yos llamó a ellos pa representar la sidre asturiana na Feria de Turismu

La 42º edición de la Feria Internacional de Turismo (Fitur), que se cellebra n’Ifema Madrid fasta el prósimu 23 de xineru acoyó na so primer xornada una mesa reonda sobre la cultura sidrera asturiana y la so candidatura ante la UNESCO pa la so inclusión na Llista Representativa del Padremoñu Mundial Inmaterial.

A la mesma asistieron el Direutor Xeneral de Cultura y Padremuñu, Pablo León, el Direutor de la Cátedra de la Sidra de la Universidá d’Uviéu, Luis Benito García; el Presidente de la Denominación d’Orixen Protexía (DOP) Sidra d’Asturies, Guillermo Guisasola; Ana Soberón, representante del Clú de Productu Sidraturismu, y Saúl Moro, presidente de la Asociación d’Escanciadores, en nome de la patronal Otea.

Nel trescursu de la xornada fízose una demostración práutica del serviciu de la sidre, pero la persona escoyía pal llabor dexaba muncho que deseyar nes sos formes y estilu, quedando nidio que del Decálogu l’Escanciador nun conocía nin la primer norma. Ante la incapacidá del echaor contratáu pol “Principado”, Saúl Moro decidió llevantase’n mediu la presentación y ufrir una demostración práutica de comu s’echa la sidre correchamente, faciendo patente la desemeyanza.

La imaxen dada xeneró la indignación de los participantes del Campeonatu d’Echaores, que nun comprenden porqué nun se llamó pa la ocasión a un d’ellos, remembrando que va años yeren los primeros clasificaos nos Campeonatos los encargaos de representar la sidre n’actos oficiales. La forma d’echalo ye la principal diferencia ente la sidre d’Asturies y la de el resto del mundu, aporfien, y si se quier mostrar porqué merez el títulu de Padremuñu Universal de la Humanidá nun pue permitise dar esa imaxen, declaren. Poro, aniciaron una campaña en redes denunciando el casu y pidiendo que se ponga en valor el llabor de los echaores “grandes profesionales qu’ensalcen la nuesa bebida de referencia y abanderen la cultura sidrera y el turismu, prestosos, atentos y guíes turísticos poles sos esplicaciones”.

 

Redaición InfoAsturies

 

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies