Los baxos niveles d’execución, llicitación y convocatoria de sovenciones correspondientes a los Fondos Europeos del Mecanismu de Recuperación, Tresformamientu y Resiliencia esmolecen a los empresarios asturianos, que tarrecen una devolución como la de los Fondos Covid

Los eurofondos confirmaos dientro’l Plan de Recuperación p’Asturies son de 394 millones d’euros, pero hasta’l momentu les convocatories llanzaes, en fase de tramitación o llicitación, sumen malpenes 39’5 millones, ello ye, qu’hasta agora solo’l 10 per cientu d’estes aides foron xestionaes pol “Principado”, una cantidá insuficiente, opinen dende la Federación Asturiana d’Empresarios (FADE) y les Cámares de Comerciu d’Uviéu, Xixón y Avilés, que tarrecen que se repita lo asocedío por mala xestión coles aides pa solvencia empresarial, de les que se devolvieron por incapacidá del gobiernu asturianu 57 de los 107 millones d’euros que l’Estáu asignara a Asturies en 2021.

Carlos Paniceres, el presidente de la Cámara de Comerciu d’Uviéu, reconoció “la esmolición” pol ritmu lentu d’unos fondos que “nun llegaron a les pymes pa xenerar empléu” y plantegó la necesidá de que’l “Principado” desendolque’l reglamentu paque tantu los colexos como les Cámares de Comerciu puedan collaborar na tramitación d’esos fondos, una posibilidá recoyía na llei de midíes alministratives urxentes aprebada n’avientu pol parlamentu asturianu. ” Nun pue repitise una devolución como la de los Fondos Estatales Covid, porque son unos recursos bien necesarios” señala.

Félix Baragaño, el Presidente de la Cámara de Comerciu de Xixón, abogó tamién por que dende les alministraciones se  facilite un mayor dinamismu pa revertir esta situación y se de un mayor puxu a los fondos yá asignaos. Noguera destacó que “queden munchos fondos por asignar y hai que xestionalos conducentemente” porque, sorrayó, “ye bien murnio perder aides, como asocedió coles estatales de solvencia´.

Pela so parte, María Calvo, presidenta de FADE reclama calces axilosos cola Alministración y plazos que faciliten la concurrencia.

Xicu Llamazares

This work is licensed under a Creative Commons Attribution 4.0 International License.