Iniciativa pol Asturianu ufierta nuevos cursos de llingua asturiana (nivel básicu 1 y nivel básicu 2) que van facese a distancia

 Iniciativa pol Asturianu abrió’l plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese a distancia y al traviés de la plataforma dixital de la organización.

Los cursos van tener una duración de 36 hores llectives y van entamar el martes 1 de febreru y acabaríen a entamos de mayu, aproximadamente.

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana.

El nivel II ta orientáu a persones con una conocencia más fonda del idioma, que yá ficieren dalgún cursu enantes.

El preciu de la inscripción ye de 60,00 € (50,00 € pa les persones asociaesa Iniciativa pol Asturianu).

Les inscripciones pal cursu pueden facese nun formulariu na propia páxina d’Iniciativa pol Asturianu, onde tamién pueden atopase toles condiciones pal mesmu. El plazu d’inscripción acaba’l vienres 28 de xineru.

Redaición InfoAsturies

This work is licensed under a Creative Commons Attribution 4.0 International License.