La plataforma en defensa del sector pesqueru Cantábricu tarrez les consecuencies de la istalación de parques eólicos n’una zona onde la plataforma costera ye escasa y les cales bien susceptibles a cambeos na redolada 
Los pescaores ven en peligru la so forma de vida poles consecuencies de la istalación de parques eólicos  na mariña.  «La pesca nun se va oponer a l’adopción de denguna midía que vaiga nel sen d’amenorgar les emisiones de gases efeutos invernaeru y ameyorar poro la salú del nuesu planeta y sobremanera de los nuesos mares, que carecen abondes agresiones derivaes de diches emisiones, con graves perxuicios pa los ecosistemes marinos de los que dependemos los pescaores… siempres que se respeten los ecosistemes marinos y la nuesa manera de vida y polo tanto nun seyamos separtaos de los nuesos mares pa industrializar les cales» declaró Torcuato Teixeira, voceru de la Plataforma Manifiestu de Burela en defensa del sector pesqueru del Cantábricu Noroeste, qu’ayeri axuntaba confreríes y asociaciones profesionales  en Puerto Vega (Navia).

Nesta xunta’l colectivu, que busca torgar el desendolcu de la eólica marina na mariña norte l’Estáu dexaron clares dos condiciones innegociables p’aceutar la istalación de parques eólicos marinos n’agües del Cantábricu: “Nun tocar les cales y nun afeutar dengún ecosistema”.

D’equí p’arriba los esfuecios de la plataforma van centrase en conseguir sofitos políticos al so manifiestu al traviés de proposiciones non de llei en ca Parlamentu autonómicu, pa lo que  van contautar con estremaos grupos políticos. En paralelu, los pescaores quieren ganase a la opinión pública con una campaña de concienciación. Si tou esto nun diere los frutos deseyaos, n’últimu términu prevén entamar movilizaciones con fecha y formatu entá non decidíu.

Redaición InfoAsturies