La promesa fecha a les zones rurales de rematar 2021 cubriendo con banda ancha al 97% de la población, fecha dientro del últimu plan d’estensión d’esta teunoloxía, el PEBA, ta llueñe de cumplise
El compromisu asumíu yera llevar una conexón d’internet de siquier trenta megabytes per segundu a 2.573 llocalidaes de 44 conceyos, ufriendo l’acesu a la rede de 42.800 viviendes y empreses allugaes nes llamaes «zones blanques». En 2022, ta previsto qu’Asturies reciba otros 12,2 millones d’euros del plan Únicu del Ministeriu de Tresformamientu Dixital pa llevar la fibra óptica al 100% del territoriu nacional, incluyendo non solo viviendes sinón horros, cabanes y güertes.
Sicasí, la promesa ta llueñe de cumplise y la fibra sigue ensin furrular na mayoría los núcleos rurales, non solo nes zones más remotes, sinón nes más averaes a les grandes ciudaes. Munchos pueblos uvieinos siguen ensin cobertoria, lo mesmo que na contorna de Xixón.
Les consecuencies son evidentes. Los estudiantes nun pueden realizar la mayoría de les sos xeres, los trámites burocráticos on line son imposibles precisamente p’aquelles persones a les que más difícil resulta treslladase a realizalos presencialmente, a nivel empresarial l’actividá llíndase descomanadamente… el resultau ye d’avezu l’abandonu de los pueblos a la gueta de llugares onde l’actividá diaria nun se vea complicada por esa desconexón del mundu virtual, onde anguañu muevese un porcentaxe perimportante de la vida social, académica y sobremanera económica.
Vitor Corte
This work is licensed under a Creative Commons Attribution 4.0 International License.
