Dientro de la táctica gubernamental de reprimir cualquier protesta ciudadana, primero con violencia y depués con xuicios y sanciones, siete de los participantes na movilización ganaera del pasáu 30 d’avientu van ser imputaos por “atentáu, mancadures y desordes”

Miles de ganaderos presentáronse’l pasáu 30 d’avientu a les puertes de Presidencia de Gobiernu pa solicitar (por tercer vegada) ser atendíos nes sos demandes por Adrián Barbón. Por tercer vegada, atopáronse les puertes zarraes por una barrera policial y un presidente que nun daba la cara. Non contentos con ello, dende les ventanes de la mesma presidencia provocóse direutamente a los manifestantes con xestos ofensivos “Daquién tenía interés en que la protesta dexenerare’n violencia” apunten los investigaos, y asina foi.

Énte la primer reacción de los manifestantes los policíes cargaron contra ellos armaos con porres y escudos, a lo que los ganaeros respondieron coles sos güiaes, nuna marraza que duró malpenes unos menutos pero que valió a les autoridaes policiales pa inculpar a 7 de los presentes, imputándolos por atentáu, mancadures y desordes. “Güel a vendetta política”, indiquen fontes cercanes a los ganaeros.

Con ello, non solo castiguen a estes siete persones a un llargu procesu de xuicios que probablemente acabe con una sanción tresmandada, sinón que xeneren mieu nel restu del movimientu, buscando prevocar el desalcuerdu y los enfrentamientos ente los mesmos manifestantes, una estratexa que lleven años aplicando, especialmente desque la Llei Mordaza lo ampara, y que’l “gobiernu más progresista de la hestoria”, neto que’l so mandáu n’Asturies, nun pierden ocasión de poner en práutica.