“Con esta campaña pretendemos facer llegar a los asturianos y a les asturianes delles bones noticies pal nuesu idioma. Queremos que la sociedá seya partícipe tamién d’estes bones noticies pa la llingua asturiana”
Iván Llera, presidente d’Iniciativa pol Asturianu, entamó güei la campaña ‘Meyor noticia pal asturianu en 2021’ cola que la organización pretende escoyer, pente medies d’una votación popular n’internet, la meyor noticia pal idioma nelpasáuañu 2021.
Vidioxuegos n’asturianu, llibros, programes de tele, manifestamientos, inclusión nel Istitutu Cervantes, la edición del Dicionariu etimolóxicu, toponimia y asina fasta 39 noticies positives. Llera comentó que “faciendo un repás a les bones noticies pal idioma nel añu 2021, dímonos cuenta de que l’añu pasáu foi ún de los que más noticies positives tuvo pal asturianu, lo cual tamién ye una bona anuncia”.
El presidente d’Iniciativa pol Asturianu señaló que “con esta campaña pretendemos facer llegar a los asturianos y a les asturianes delles bones noticies pal nuesu idioma. Queremos que la sociedá seya partícipe tamién d’elles”.
Iván Llera terminó diciendo que “los y les participantes pueden escoyer un total de 8 bones noticies pal asturianu de diferente tipu d’un total de 39. La votación entamó esti llunes 3 de xineru y va acabar el vienres 14 d’esti mes. Amás, los y les participantes van participar nun sortéu de llibros n’asturianu”.
Redaición InfoAsturies
This work is licensed under a Creative Commons Attribution 4.0 International License.
