Pesi a lo que diz la campaña contra la masificación turística d’Andecha Ástur, paez que Asturies si ta en vienta, y bien barata. Mercar pueblos enteros por menos de lo que cuesta un pisu na ciudá ta de moda; vistes panorámiques, terrén y unes casines bien guapes, ensin la incomodidá de vecinos, vaques o gallos que fadien ¿Qué más pue pidir cualesquier urbanita pa un retiru sele y bien cuqui nos montes?
Anguañu, n’Asturies hai daqué más d’una docena d’aldegues en vienta con precios que bazcuyen ente los 69.000 y los 2 millones d’euros. Por menos de 70.000 euros puede mercase una aldega con delles edificaciones, horru, llagar y finca de casi 20.000 metros cuadraos, nuna reserva de la biosfera, “con espacios pa esfrutar de la caza y la pesca y bona señal de móvil”.
La más cara, daqué más de dos millones, tien 770 hectárees, 14 cases, cortes… nel llote vienen incluyíos fasta los muertos, cola propiedá de la ilesia y campusantu.
Los compradores nun acostumen ser asturianos, muncho menos averaos al mundu rural. Nun van recuperar la ganadería, l’agricultura nin la cultura tradicionales. Aldeasabandonadas.com, una de les empreses referencia a nivel nacional na vienta d’esti tipu de propiedaes lleva 14 años d’esperiencia na vienta de pueblos y almite que l’enclín ta n’alza. Trátase, despliquen, de xente con ingresos bien altos, dispuesta a teletrabajar, a montar un negociu de turismu rural, o que busca una segunda residencia pa les vacaciones a bon preciu.
Vitor Corte
This work is licensed under a Creative Commons Attribution 4.0 International License.
