El de Chemastur ye un de los escasos casos nos qu’inclusive los trabayadores  denuncien la contaminación de la so propia empresa

Nel so ventiavu novena edición, tres un fondu analís, alderique y deliberación ente toles candidatures propuestes, abondoses y con abondos méritos pa trunfar, la Coordinadora Ecoloxista escoyó otorgar la Bullada Purpurina a la empresa Asturiana de Fertilizantes SA (Chemastur), allugada na llocalidá de San Xuan, nel conceyu de Castrillón, por ser una de les empreses más denunciaes polos vecinos y trabayadores polos continuos episodios de contaminación del aire, desque empecipió la so actividá nel añu 2006 na fabricación de fertilizantes fosfataos.

Chemastur tien una dilatada hestoria de infraciones contra les condiciones medioambientales y de salú llaboral, siendo asina que los mesmos trabayadores de les sos istalaciones sumáronse a les protestes denunciando y faciendo fuelgues poles continues fugues de gases y polvu a l’atmósfera,  pa los que nun tienen medios de proteción.

Chemastur emiti al aire, según declara la empresa, grandes cantidaes de Dióxidu de carbonu, Partícules Pm10, Ósidos de Nitróxenu y en menos midíaFlúor, Cloru y Compuestos Inorgánicos.

Esti “galardón”, que nun ye fenguna chancia, apúrrese añalmente’l 28 de febreru en reconocencia al llabor y aciones d’empreses, istituciones y/o alministraciones que más se destacaron nel so enfotu contra’l caltenimientu de la natura ya’l mediu ambiente asturianu. Ente los nomaos atopábense tamién otros dignos acreedores d’esta distición, como la papelera de Navia, Ence, Arcelor Mittal, Orovalle o les empreses llétriques.

Redaición InfoAsturies

This work is licensed under a Creative Commons Attribution 4.0 International License.