Nun foi dica’l 2011 que’l Conseyu de Gobiernu de la Universidá d’Uviéu aprebó oficialmente nel so Reglamentu d’Estudios de Doctoráu la posibilidá d’usar l’asturianu na presentación de tesis. Esa oportunidá foi aprofitá pol escritor Xuan Santori Vázquez quien presentó la so tesis “El papel de los escritores del Surdimientu na recuperación del asturianu: la visión del escritor”.

Hebio qu’esperar otros cincu años pa que s’animare daquién más y se presentare, nesti casu na Universidá de Vigo, la tesis “Bases pa un Corpus de teatru n’Asturies”, d’Antón Caamaño.

De magar el 2018 ye cuando entamamos a topar un mínimu d’una tesis al añu presentada n’asturianu. Esi añu foi “L’allugamientu del dialeutu senabrés dientro del dominio ástur. Estudiu descriptivu de la fala senabresa” del doctorandu Xuan Xosé Lajo Martínez.

La del 2019, a cargu d’Andrés Menéndez Blanco, tien el méritu de ser una de les dos úniques que nun tan cientraes direutamente na llingua o lliteratura asturianos, sacando l’asturianu del ámbetu filolóxicu cola so tesis”Estudios diacrónicos del paisaxe y el poblamientu nel noroeste ibéricu: el territoriu d’Ayande (sieglos I-XIII)”

Nel 2020 foron dos, “La llingua asturiana nel Franquismu”, del escritor Inaciu Galán, y la primera presentá por una muyer, Claudia Elena Menéndez, “El sistema de denominación de los neños abandonaos n’Asturies”

Finalmente nel 2021 Xurde Fernández presentaba “Trabayar por proyectos na asignatura de Llingua Asturiana y Lliteratura na Educación Secundaria Obligatoria” y ya nel esmucerín del añu, la que presentará’l 20 d’avientu Monteavaro.

Nesti resume pue güeyase una progresión, llenta pero continua, de la presencia del asturianu nes tesis doctorales de la Universidá, creándose pali que pali un corpus bibliográficu universitariu de pesu, pero siendo destacable que la cuasi totalidá d’elles son de calter metallingüista, espeyando la necesidá de sacar l’usu del asturianu a otros ámbetos.