Lloñe d’escuchar al pueblu asturianu, que protagonizó una multitudinaria protesta el xueves pasáu, el “Principado” ponse a la defensiva, negando la evidencia “D’abandonu, na de na”

Ante les protestes d’agricultores y ganaeros el “Principado” nun solo nun cuenta estudiar les sos revindicaciones nin guetar soluciones que faciliten la vida en campu y frenen el despoblamientu de la fastera rural asturiana, sinón que, con un 70% d’Asturies n’altu riesgu de despoblase dafechu, nieguen que les polítiques desendolcaes pol PSOE nes caberes décades llevaren a la ruina al sector.

Argayos mortales pol abandonu les carreteres, preslle de colexos, ausencia d’atención mélica, permisividá pa colos intermediarios que paguen a agricultores y ganaeros menos de lo que yos cuesta producir, ausencia de tresporte públicu, normatives que torguen l’actividá rural, priorización del turista frente al habitante, desaniciu… si, en cierta manera Alejandro Calvo Conseyeru de Desendolcu Rural, Agroganadería y Pesca tien la so parte de razón al decir que “d’abandonu, na de na”.

Lo del campu asturianu ya nun ye abandonu, ye destrución activa, desaniciu intencionáu d’unes redes sociales y económiques que se caltuvieron demientres sieglos, asegurando la soberanía alimenticia y siendo amás un emportantísimu reservoriu cultural ya identitariu.

Ta por ver comu sienten estes pallabres pente los que se manifestaben reclamando los mesmos drechos pa los asturianos rurales que pa los urbanites, pero l’actitú del gobiernu dexa pocu espaciu al diálogu.