“La clas obrera de Llangréu tien de saber ónde gasta’l so dineru. Nun consumas onde esploten a la nuesa mocedá”

Dende la CNT-AIT de La Felguera piden que nun se consuma nel Café Urban mientres nesi establecimientu nun se respeten los drechos llaborales de los sos trabayadores.

Al tener conocencia de que na Cafetería Urban, en La Felguera, teníen na so plantiya siquier un trabayador ensin dar d’alta na seguridá social, el sindicatu interpunxo una denuncia énte la inspeción de trabayu, que dio d’alta d’oficiu a esti trabayador.

Darréu, la CNT púnxose’n contautu col empresariu pa que se abonaren los xornales pendientes al trabayador, ensin que la xerencia diere una rempuesta clara nin tomare les midíes oportunes. Poro, ponen la situación en conocencia de los ciudadanos y piden la collaboración de la población de Llangréu pa primir a esta cafetería, consumiendo n’otros establecimientos.

Nuria Prendes

This work is licensed under a Creative Commons Attribution 4.0 International License.