• Portada
  • >
  • Asturies
  • >
  • Cuasi’l 10% de la población asturiana depende de dalguna prestación o aida social pa vivir

Cuasi’l 10% de la población asturiana depende de dalguna prestación o aida social pa vivir

  • 8 Payares, 2021

Más de 94.000 asturianos dependen pa vivir del Salariu Social, del Ingresu Mínimu Vital o de dalguna de les prestaciones por desemplegu

20.071 asturianos dependen del Ingresu Mínimu Vital y otros 41.981 viven gracies al Salariu Social Básicu. Amás, de los 32.119 que perciben prestaciones pol desemplegu, son 18.000 los que perciben ingresos menores a los 452 euros al mes, un total de cuasi 80.000 asturianos que, más que vivir, sobreviven con unos ingresos de 530€ de media. Mentanto, otros 5.209 siguen esperando respuesta a la so solicitú d’ayuda y 14.130 vieron refugada’l so pidimientu de IMV, lo que representa qu’un 60% del total de les solicitúes d’ayuda son refugaes.

Vivir puramente d’una prestación, yá seya estatal o autonómica, non solo implica que malpenes se puedan cubrir económicamente les necesidaes más básiques, sinón que tal como tán plantegaes estes aides crea una dependencia absoluta, bien cercana a la sumisión, qu’enzanca descomanadamente salir d’esi círculu viciosu.

Ello ye qu’atopar trabayu mientres se ta cobrando una d’estes prestaciones xenera un dilema a los beneficiarios. Nel casu del SSB, un contratu implica la interrupción de la prestación mientres la duración del mesmu, daqué aparentemente llóxico. Sicasí, la llentitú de les xestiones y el fechu de que más del 90% de les contrataciones seyan temporales lleva a qu’una vegada rematáu’l contratu haya demorances d’hasta un añu primero que se recupere’l cobru de la prestación, dexando entrín y non a les persones afeutaes ensin nengún ingresu. Pela so parte, el IMV calcúlase’n función de los ingresos del añu anterior, ello ye, cualisquier salariu percibíu rsti añu va implicar una amenorga nos importes mensuales a percibir mientres tol añu viniente.

Estes informaciones sobro les ayudes sociales confirmen lo yá alantrao pola Rede Asturiana de Llucha contra la Probitú y l’Esclusión, que certifica que l’añu de la covid llevó a 30.000 asturianos a la ruina hasta alzar la tasa de probitú del país al 27,7%, asina comu los datos del Institutu Nacional d’Estadística (INE) cola so Encuesta de calidá de Vida, que reflexa’l lideralgu asturianu cifres de desigualdá económica, al pie de les ciudaes autónomes de Ceuta y Melilla. El Pueblu Asturianu ye cada vez más probe.

 

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies