• Portada
  • >
  • Esportes
  • >
  • Presentación del llibru “La virtú na montaña, vindicación d’un alpinismu llento, illustráu y anticapitalista”

Presentación del llibru “La virtú na montaña, vindicación d’un alpinismu llento, illustráu y anticapitalista”

  • 4 Payares, 2021

Nesti llibru Batalla rellata’l tresformamientu del montañismu como espeyu del cambéu escontra una sociedá rápida ya individualista, que prioriza la eficiencia y la productividá perriba de los valores tradicionales del montañismu, como’l compañerismu, la conocencia, la implicación cola redolada y l’esfrute de la guapura

Hai más d’un añu de la espublicación d’esti llibru. Sicasí, l’andanciu complicó les coses, polo que la so presentación na 43 Selmana Internacional del Monte atraxo a numberoses persones a escuchar al so autor, Pablo Batalla Cueto, que vien d’espublizar el so tercer llibru “Los nuevos fudres del nacionalismu español”

Nel so segundu llibru, “La virtú na montaña, vindicación d’un alpinismu llento, illustráu y anticapitalista” Batalla fala del cambéu na forma d’entender el monte, dende un montañismu fraternu y contemplativu escontra una forma de vivir la esperiencia montañera individualista y competitiva, que ye en realidá la espresión d’un cambéu enforma mayor, con implicaciones en tolos ámbetos.

El monte ye en cierta manera una escusa para falar del gran tresformamientu que ta careciendo la sociedá, d’un cambéu de paradigma, del capitalismu nel que vivimos, “un nuevu capitalismu neolliberal cada vegada mas aceleráu o turbocapitalismu” que devasa lo económico, siendo una cosmovisión completa que s’impón al traviés d’una pedagoxía que coloniza cada ámbitu de la vida, tamién el montañismu, pa tresmitir los so propios valores:  individualismu, eficiencia, productividá, consumismu, velocidá, competitividá… conceutos que se treslladen a tolos ámbetos -amor, enseñanza, trabayu, montañismu-  “como una triba de totalitarismu de la velocidá del que nun se puede escapar.”

La segunda parte del so llibru ta formada por una serie de semblances de montañeros hestóricos qu’encarnaron la mirada llento ya implicao sobro la montaña que Pablo Batalla revindica. Ente elles atopamos al Che Guevara, el Padre Alberto María de Agostini, o les primeres alpinistes que xubieron el Mont Blanc, dedicando una interesante reflexón a la temática feminista, yá que fueron non poques les pioneres del alpinismu qu’atoparon nel montañismu la so vía de lliberación.

Llucía F. Marqués

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies