Los depósitos d’agua del conceyu de Bimenes, nos que s’almacena esti recursu pal so tratamientu y posterior distribución a la población cunten agora con un nuevu sistema de potabilización, lo que supón una importante meyora na calidá de l’agua suministrao
Les obres, que fueron executaes por Asturagua y financiaes nun 70% gracies a una convocatoria de subvenciones de CADASA, lleváronse a cabu nun total de dolce depósitos de regulación de les cuatro zones de suministru del conceyu. Consistieron na instalación de sistemes de desinfeción afechos a les necesidaes de ca depósitu, p’asegurar en tou momentu la correcha cloración de l’agua suministrao a la población.
En base al estudiu realizáu nes zones de suministru d’agua del conceyu optóse pola instalación d’equipos de dosificación de hipoclorito sódicu por aciu electrobomba dosificadora, que garanticen el tratamientu óptimo de l’agua captao.
Nos dos depósitos principales del conceyu -Riolo Miyar y Cueto Suares- tamién s’instalaron equipos de midía de cloru y ph en continuu, que dexen regular la dosificación de hipoclorito sódicu en función de los parámetros de calidá de l’agua’l depósitu. Amás, na mayoría de los depósitos yera necesariu disponer d’enerxía llétrica p’alimentar les bombes dosificaores; pa ello, incorporáronse sistemes fotovoltaicos col fin d’evitar la emisión de CO2 a l’atmósfera y, d’esta miente, contribuyir al cuidu del medioambiente.
Redaición InfoAsturies
This work is licensed under a Creative Commons Attribution 4.0 International License.
