La concesionaria Aucalsa, cola conivencia y participación de los gobiernos asturianu y estatal, ve correcho cargar sobro los asturianos los 2.000 millones d’euros más qu’esperaben ingresar nestos años

Güei l’autopista del Güerna tendría de tener les barreres llevantaes. Qué digo llevantaes, esaniciaes, desmontaes, sumíes. Tendría de ser llibre la salida ya entrada a Asturies, ensin la multa de 13,50 por abandonar el país. Ayeri foi’l día nel que se cumplía’l fin de la concesión a Aucalsa pol aprovechamientu de l’autopista y el Güerna tendría de ser de llibre circulación.

Pero non. Gracies a la maraviyosa xestión, de Francisco Alvarez Cascos, primero, aumentando la concesión, y dempués de toos el presidentes del “Principado”, carentes de toa capacidá de presión nel gobiernu estatal, incompetentes p’axustar una solución, los asturianos vamos tener que siguir pagando mientres 29 años más.

La concesionaria defende que solo recuperó un terciu de invertir na autovía. Suponiendo que ye ciertu’l datu ¿dende cuando l’usuariu tien de pagar la mala inversión o mala xestión d’una empresa? Les noticies recueyen que quieren ingresar otros 2.000 millones d’euros; dicho otra manera, los asturianos vamos pagar otros 2.000 millones d’euros a la sociedá Autopista Concesionaria Ástur-Lleonesa, S.A. (Aucalsa).

Amás de los ingresos pola esplotación directa de la AP-66, Aucalsa tamién recibe bonificaciones del Estáu p’abaratar el preciu que paguen los usuarios. En 2021, esa bonificación ye de 6,1 millones, qu’hasta agora nun se traducieron en rebaxa nel costu. El proyeutu de presupuestos 2022 alza la cantidá a 9,1 millones, ensin que s’especificare entá la repercusión que van tener na tarifa qu’abonen los usuarios. Seya que non, la cifra queda bien llueñe de los 55 millones que l’Executivu de Pedro Sánchez va destinar, per segundu añu consecutivu, a compensar el pagu en la AP-9 en Galicia.

Mentanto, los precios del Güerna son los terceros más caros por kilómetru percorríu de too l’Estáu.