Depués d’un añu y mediu ensin faer actividaes presenciales, la Lliga Celta d’Asturies entama una visita guiada a los castros de Mouguias y Cabo Blanco el prósimu 23 d’Ochobre
Trátase d’una visita guiada pol doctor n’arqueoloxía Ángel B. Villa Valdés, antiguu director del Parque Arqueolóxicu Navia-Eo y angüaño arqueólogu del Muséu Arqueolóxicu d’Asturies a los castros de Mouguías nel conceyu de Cuaña y el castru de Cabo Blanco nel conceyu d’El Franco.
Mientres la visita a cada castru, d’aprosimao 2 hores de duración, l’espertu internacional Ángel Villa va desplicar a los asistentes los secretos d’esos xacimientos.
Amás del valor hestóricu-cultural de los xacimientos que se van visitar dende la Lliga Celta destaquen el descomanáu valir paisaxísticu y natural de la redolada de dambos.
Ufren tamién la posibilidá de participar nuna xinta conxunta al final de l’actividá, na que compartir cualisquier duda, idega u opiniones sobro la tema d’esta actividá y otres que puedan surdir.
La visita tendrá llugar el 23 d’Ochobre y la cita ye a les 11:30 a la entrada del Castru de Mouguías, onde los participantes iscritos sedrán recibios por Fernán Morán, presidente de la Lliga Celta d’Asturies.
Redaición InfoAsturies
This work is licensed under a Creative Commons Attribution 4.0 International License.
