Nel intre’l Salón presentaráse’l primer videoxuegu concebíu y desenvueltu al 100% n’asturianu, Tiempu de Lleendes

El próximu 16 d’ochobre llega a Xixón la Segunda Edición del Salón del Videoxuegu, un eventu que combina la formación y l’arruelu nel sector de los videoxuegos.

Plantegáu tantu p’aquellos a los que-yos interesa entamar la so carrera profesional nel sector como a los que namás busquen pasar una tarde d’arruelu, l’actividá estrémase’n dos espacios. Unu centráu na promoción del sector del videoxuegu asturianu, según na internacionalización del videoxuegu con distintes conferencies y masterclasses. El segundu, situ na segunda planta, va ser un espaciu pa esfrutar de les nueves consoles PS5 y Xbox X lo mesmo que de la realidá virtual y los torneos de Smash Bros y de Tekken.

Simultaneamente, nel Auditoriu van tener llugar una riestra d’interesantes conferencies. A primer hora,
Phil González (Meteorbyte Studios) va inaugurar el Salón falando de cómo espublizar videoxuegos dende Asturies .

De siguío Daniel Santigosa (presidente de ICOA) va centrar la so intervención na producción d’eventos indie: la esperiencia del Indie Dev Day 2021.

De los “peros” de faer videoxuegos va falanos Javier Gálvez (Mangu Protocol); yá pela tarde y a les cinco Laura González va encetar la tema “Ma quiero ser desarrolladora de videoxuegos”. La siguiente conferencia, al cargu de Mariona Valls (Mangu Protocol) lleva por títulu “¡Level up! Artista de Videoxuegos” y finalmente va tener llugar la intervención Adrián Carbayales Terés, quien nos presentará la so RPG en asturianu “Tiempu de Lleendes”.

La entrada ye de baldre hasta completar aforu magar s’encamienta acutar plaza pa les conferencies.