Dende la Cofradía de Pescadores del Santo Ángel de Viavelez refuguen frontalmente la esplotación minera en Tapia por poner en pelligru el so mediu de vida y la biodiversidá costiega
En Viavelez hai n’activu 8 embarcaciones con un total de 16 tripulantes que viven de la pesca del pulpu más otros 7 perceberos. La so flota foi de les primeres nel mundiu n’algamar la certificación internacional MSC de pesca caltenible del pulpu, premiando asina el so enfotu de trabayar de manera respetuosa cola natura y l’entornu, respetando la biodiversidá ensin dañar l’ecosistema.
Agora ven comu’l so enfotu y la so forma de vida se ven menaciaos pol proyeutu d’esplotación d’una mina d’oru en Tapia, agraváu cola istalación d’un emisor sumarín pa evacuar na mar les agües residuales d’esta industria, de les más contaminantes del mundiu. Con ello non solo pondríen en pelligru el so trabayu actual, sinón que’l dañu sedría irreversible y taríen hipotecando tamién la posibilidá de trabayu de futures xeneraciones.
Jose Manuel García Alonso, Patrón Mayor de la Cofradía, declaraba que “mientres muncha xente colaba del pueblu a les ciudaes nosotros apostemos por seguir dando vida a los nuesos pueblos … desiximos a los políticos que nun mos abandonen y creemos firmemente que si s’esplota la mina llamentaránlo en pocos años, cuando quedemos ensin pesquería, ganadería, hostelería nin turismu con un Mar Cantábricu más contamináu que nunca”.
Redaición InfoAsturies
This work is licensed under a Creative Commons Attribution 4.0 International License.
