La fuelga nel Grupu d’Empreses ALSA continuó ayeri con un siguimientu total de los y les trabayadores de la empresa, esperándose pa mañana otra xornada de paru
Depués de 4 díes de fuelga nos que, sacantes los abusivos servicios “mínimos” impuestos pol Gobiernu d’Asturies en connivencia cola empresa, el paru foi total, la direutiva continúa aneciando na so actitú y niégase a sentase a negociar les propuestes feches polos representantes de los trabayadores. Poro, continúa convocada la fuelga pa mañana, neto que los díes 8, 11 y 13. Si pa entós nun hai solución, la mesma pasará a ser indefinía.
Sábese qu’ALSA ta intentando forciar a acudir al so puestu a trabayadores eventuales, aprofitando la vulnerabilidá de los sos contratos, pa intentar romper la xunidá, pero la gran mayoría d’estos tán negándose a trabayar, exerciendo’l so drechu a la fuelga, pesia que tan siendo coacionaos con menacies direutes de non renovación de contratu. Per otru lláu, anunciando ya el so escasu enfotu negociador, la empresa yá mandó los servicios mínimos fasta’l día 23 d’ochobre.
Los trabayadores denuncien asina mesmo l’actuación de la policía poniendo torgues al llabor llegal de los piquetes informativos.
Los emplegaos agradecen el sofitu de la mayoría los usuarios y usuaries del so serviciu de tresporte, que yos amuesen el so apoyu a la fuelga, magar les molesties que tienen de carecer.
Nuria Prendes
This work is licensed under a Creative Commons Attribution 4.0 International License.
