Depués del parón forciau del 2020, Grau acueye otra vuelta esta cellebración que llama a tolos asturianos a llucir el so traxe’l país
El domingu cellébrase’n Grau’l IV Díe’l traxe’l país, col envís da-y al nuestru paxellu tradicional el protagonismu que merez porque, dicen los sos organizaores “anque siempre ta presente en toles cellebraciones asturianes, ye de xusticia que tenga una fiesta propia: un día pa vistir, llucir y vivir el traxe”.
La idega ye enllenar la villa de Grau con xente vistío con reproduciones de traxes asturianos de la segunda metá del sieglu XIX nuna fiesta de reivindicación de la cultura asturiana na que ver y enseñar la nuesa ropa tradicional y sentise arguyosos d’ella.
El programa d’actividaes d’Indumentaria 2021 va arrancar a les diez de la mañana con música tradicional. A les once, na Plaza los Dolores de Grau, va entamar el Quintu Concursu de Traxes Tradicionales Asturianos “Indumentaria 2021”. Van poder participar, inscribiéndose nesta web del 1 al 20 de setiembre, homes y muyeres pa llucir el traxe’l país de gala o de diario.
Nesti certame, un xuráu cualificáu, plural ya independiente va repartir 900 euros en premios. Ye importante precisar qu’Indumentaria nun ye un certame de guapura física, ye un concursu onde se va valorar que les persones se vistan con xeitu y fachenda según les fontes documentales que se conocen, reproduciendo la manera de vistir de los asturianos de mediaos del sieglu XIX.
Llucía F. Marqués
This work is licensed under a Creative Commons Attribution 4.0 International License.
