Más de 3.300 mabees sacrificaes en baldre de magar el 2005

  • 20 Setiembre, 2021

4 organizaciones ambientales asturianes  desixen al Gobiernu Asturianu que nun siga matando mabees, alegando que nun hai estudios científicos qu’afiten qu’esa midía seya beneficiosa pa recuperar les poblaciones de salmónidos, al tiempu que los censos de mabees grandes ivernantes amuesen unu enclín negativu en cuanto al númberu d’aves d’esta especie

Dende hai años, el Gobiernu del “Principado” vien plegándose a les desixencies de delles sociedaes de pesca esportiva, qu’acusen a les mabees de ser la principal causa del cayente de les poblaciones de salmónidos nos ríos asturianos. Diches asociaciones desixen a l’alministración la erradicación de les mabees de les cuenques fluviales asturianes y de camín actuar tamién sobro otres especies protexíes como llondrigues, garces, andarrios, etc.

Ante eses presiones, que pretenden que s’ntame yá n’ochobre a matar mabees, les asociaciones ambientalistes, animalistes y de pescadores reclamen que s’abandone esta midía d’una vegada por toes.

Denuncien amás que les autorizaciones pa la eliminación de mabees que’l Principáu lleva practicando dende va años, tramitense por aciu resolvimientos internos que nun salen a información pública nin s’espublicen nel BOPA esto ye, con absoluta falta de tresparencia y participación pública. Coles mesmes, manifiesten la so disconformidá y perplexidá con que’l gobiernu siga ensin responder por con estudios científicos (como obliga la llexislación) la supuesta incidencia d’esta especie nel cayente de les poblaciones de salmónidos nos ríos Asturianos.

Según datos de la mesma Alministración, sacrificáronse más de 3.300 aves dende 2005, añu en qu’empezaron los descastes. A esti númberu habría que sumar los exemplares que nun se contabilizaron por nun ser recoyíos, bien por escapar mancaos o pola imposibilidá d’aportar a los cadabres, polo que’l númberu total d’aves abatíes ye entá mayor.

Los censos añales de mabees grandes ivernantes n’Asturies amuesen un claru enclín negativu de la especie. En 2021 rexistráronse 303 mabees menos que n’añu anterior. Ensin embargu, y como yera esperable a la lluz de la conocencia científica, dichu cayente nun se ve espeyáu nun xorrecimientu de les poblaciones de salmónidos, si non al contrariu, estes poblaciones siguen nun marcáu descensu, esto ye, a pesar d’apostase por una midida tan drástica y enllargada nel tiempu, nun se consiguió frenar el cayente de les poblaciones de salmónidos, que yera l’oxetivu escorríu cola matanza de mabees.

Los verdaderos problemes causantes del cayente de truches y salmones nos ríos son, apunten dende les entidaes ecoloxistes, otros, como la contaminación, el furtivismu, los enriamientos y dragaos, la destruición del monte de ribera, la presencia de preses, de banzaos y otres torgues que torguen el llibre movimientu de los pexes a lo llargo los ríos ya’l so acesu a les zones de freza nes cabeceres, la erosión xenética de les poblaciones de peces por mor deles repoblaciones, la introdución nos ríos d’especies alóctones y la estracción, al traviés de la pesca esportiva, de los pexes adultos reproductores que tendríen de ser la clave p’asegurar la supervivencia d’estes especies piscícoles.

Por too ello desixen al Gobiernu de Asturies nun documentu robláu por 14 asociaciones el cese derréu de la práutica de descastes de mabea grande, que s’asitien en contra del control d’otres especies de depredadores protexíes pola llexislación actual, como llondrigues, garces o andarrios y qu’acometa les actuaciones necesaries p’asegurar el caltenimientu de les especies autóctones de salmónidos (trucha común y salmón atlánticu), que tendríen d’incluyir necesariamente la recuperación de los calces fluviales, la eliminación de torgues, la persecución efeutiva del furtivismu, la llucha contra la contaminación, l’abandonu de les repoblaciones, l’amenorgamientu de los cupos de captura pa la trucha y dexar solo la pesca con captura y suelta pal salmón.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies