• Portada
  • >
  • Opinión
  • >
  • Un 8 Setiembre radiografía d’una Asturies esquizofrénica

Un 8 Setiembre radiografía d’una Asturies esquizofrénica

  • 10 Setiembre, 2021

Llucía F.M

Perdonaime si entardé más de lo que supuestamente se debiere n’escribir esti artículu. Si, ya se que pasaren dos díes dende l’0chu setiembre, pero ye que me ficieron falta pa procesar la chifladura. A estos altores debiera tar avezada al surrealismu intrínsecu del díi ente dii d’esta Asturies de nueso y sobre tou, a la incongruencia de los sos “dirixentes”; pero non, nun m’avezo

A ver como lo cuento.
Anteayeri n’Asturies estremábense fasta cinco maneres de “cellebrar” el díi d’Asturies, porque, temos d’alcuerdu na fecha o non, enagora, esi ye’l díi oficial pa que caún defina la so relación col país.
El grupu más numberosu, por triesti que suene, ye’l de los asturianos pa los que’l so díi paso ensin pena nin gloria, comu un festivu cualisquiera más, como muncho cellebrándolo en versión romería folixera. Nel polu contrariu, el garapiellu más escasu, los que se sentaron a escuchar obedientemente a los sos superiores veníos a costafecha dende Madrí p’adroctinar a los acólitos de provincies, bien arrequexainos nel Pueblu d’Asturies pa nun llamar l’atención más de lo xusto.
Metanes, los que salieron a la cai a reclamar un futuru dinu pal Pueblu Asturianu, percorriendo les cais de Xixón nun manifestamientu con un llema y unos plantegamientos que, al mio probe entender, debiere atrayer a munchos miles d’asturianos… sicasí, nun algamaron nin al primer millar. Comu reaición inmediata a estos tan los que nun fexeron absolutamente res, pero que se llancen comu llobos contra los anteriores porque nun lo ficieron más y meyor. Finalmente, y comu remate esperpénticu másimu, los que finquen la rodiella mansamente en nome de dalgún dios, pente ellos el nuesu presidente.
Un presidente “de izquierdes” que se fae nomar socialista y que va a misa comu los meyores siguidores del réxime, un “progresista” que remanez sumisu ante’l discursu del odiu del arzobiespu Sanz Montes, que’n plena homilía afirmó “Ya quisiera yo que neños abortaos o ancianos eutanasiaos ensin paliativos tuvieren la llexislación protectora que se brinda a los toros”, asumiendo Barbón l’ataque a los drechos civiles ensin gorgutar.
Agora vien la mio reflexón. Esti díi debuxa un esquema perfechu de lo que ye Asturies. Políticos d’izquierdes que comulguen -lliteralmente- cola drecha más radical, aspirantes a dirixentes escuchando atentamente istruciones de Madrí, una estaya irredenta, señaldosa d’una Asturies lluchaora de la que son resclavu, cargando col llastre de críticos cainites qu’escusen la so inaición tirando piedres al propiu teyáu y, perriba tou, un mar d’asturianos a los qu’Asturies nin yos va nin yos vien.
Asina ta’l panorama.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies