Na concentración, que tendrá llugar n’Uviéu, espondránse les vindicaciones de los convocantes por un meyor futuru p’Asturies y anunciaráse la convocatoria d’un manifestamientu pal 8 setiembre
“El futuru nes nueses manes” ye’l llema que preside la concentración que tendrá llugar n’Uviéu el prósimu miércoles 1 de setiembre, a les siete de la tardi delantre la Delegación de Gobiernu, con una segunda convocatoria a les ocho delantre la Xunta Xeneral del Principado.
Los convocantes, ente les que s’atopen Andecha Astur, Bloque Críticu, Corriente Sindical d’Izquierda, CNT, Comité d’Asturies pola Amnistía, Mocedá Comunista, FAMYR, Nora Antifa asina como presones a títulu individual, quieren tresmitir el so comencimientu de qu’Asturies tien futuru, siempres que se lluche por él.
La posibilidá de la mocedá de facer el so proyeutu de vida n’Asturies, la creación de puestos de trabayu abondo y con salarios y condiciones llaborales afayaices, la meyora de la calidá de los servicios públicos y de les pensiones son dalgunes de les sos vindicaciones. Tamién reclamen “Una Asturies ensin llugar pa la corrución y sí pa la Memoria Hestórica y la xusticia, onde la llucha sindical y ciudadana nun seya criminalizá y reprimía. Una Asturies, en definitiva, onde la soberanía popular y la solidaridá obrera permitan que la clas trabayadora decida’l so futuru”.
Los convocantes piden al Pueblu Asturianu que se xuna a ellos y conviden a participar na concentración del 1 de setiembre n’Uviéu. Na mesma, amás d’esponer le sos vindicaciones, anunciarán la convocatoria d’un manifestamientu pal 8 setiembre, que saldrá a les 12’30 h de la Plaza L’Humedal, en Xixón.
Redaición InfoAsturies
This work is licensed under a Creative Commons Attribution 4.0 International License.
