Tratando de ser positivu, Adrián Barbón, presidente d’Asturies, sabe lo que’l pueblu asturianu quier y lo qu’Asturies necesita: Soberanía.  Eso despréndese ensin dificultá de los sos tuits nos qu’aporfia en que “Asturies ye dueña del so destín”. Si nun fuere -como-y retruquen nun de los munchos tuits de rempuesta que recibió- qu’elli y los suyos nun quieren que lo seya…

Siendo realista, Barbón nun ye, comu tamién-y faen notar delles persones al traviés de les redes sociales, más qu’un títere sociollistu que preside una istitución, el “Principado”, impuesta dende Madrid, obedeciendo los dictaos d’un partíu español que lleva más de 40 años decidiendo lo que se fae n’Asturies. Si por daqué destaca Adrián -aparte de la so escelencia nel noble arte del posturéu y la semeya- ye precisamente pol so servilismu y sumisión a los dictaos centraliegos.

La cuestión ye que ye mui cuciu y sabe perbien que soberanía ye esautamente lo que quieren, lo que necesiten y lo que demanden los asturianos, decidir el so futuru, y comu bon creador d’espeyismos que ye recueye esa desixencia de Soberanía y remánala al so porgüeyu, ensin dar un pasu alantre, repitiendo la mesma maniobra que cola Oficialidá.

Y ye que nun hai na que preste al nuesu presidente más que les pallabres grandones  y los xeitos  pa la galería, que finen siempres col coletu -direutamente espresáu o implícitu- del “nun tenemos competencies” col que esculpia la so ferrea obediencia ya inmovilismu.

Val, campión, si nun ties competencies, si Asturies nun tien competencies, algámales. Si sabes que lo que fae falta ye Soberanía, refuga esi estatutu que se mos impuso ensin poder votalu, llevántate escontra’l poder centraliegu -siguiendo los pasos d’aquel otru presidente del PSOE, tamién de la Cuenca’l Nalón pero tan estremáu- y consigue  qu’Asturies, qu’el pueblu asturianu, seya soberanu y decida de verdá.

Y sinon… calla la boca.