Daniel Álvarez prepara la so carrera en solitariu

  • 23 Agostu, 2021

Depués de collaborar con dellos grupos y bandes de gaites Dani Álvarez, el músicu del “folk ensin llímites” ta trababando nel so primer discu en solitariu

– ¿Cómo describiríes la to música?

Na mio páxina web ocurrióseme poner una etiqueta que diz, “folk ensin llímites”, lo que quier dicir que na música que fago o nes formaciones a les que pertenezco, siempre venceyaes al nuestru folclor, puede dise dende lo más tradicional a lo más modernista, tocando incluso otros estilos musicales. En definitiva, ver la música de raigón dende una visión global.

– ¿Cuántos instrumentos toques?

Entamé de bien neñu cola gaita y ye col instrumentu que más indentificáu me siento, pero los años, la esperiencia y la conocencia de saber qu’hai vida más allá, llevóme a interesame pola flauta travesera, la Uilleann Pipe (gaita irlandesa), el bouzouki, la guitarra acústica y delles percusiones. Ensin escaecer el clarinete, instrumentu qu’escoyí n’homenaxe a mio güelu que yera clarinetista, cuando se decidió que tenía que dir a una escuela música y tener un poco de formación reglada, pero col que tuvi una curtia rellación por enfotame más na gaita naquellos años d’entamu. Prestábame rescatalu y afondar nél.

– ¿Qué te llevó a dedicate a la música, y en concreto, a esta música, cual foi la to inspiración?

La mio carrera ta marcada pola figura de mio güelu maternu Antonio.
Un gran apasionáu de la música, emigráu de la so Andalucía natal, que tocaba’l clarinete por afición, anque tamién ganó perres con él y foi quien m’enseñó los primeros cantarinos de chigre.

La música tradicional y yo, nun uncíamos muncho cuando tolos años, el 11 de payares, xubíamos a Morea d’Ayer a comer les fabes a ca mio güela, na perconocía fiesta de Los Humanitarios y nun había escapatoria de tantu gaiteru alrodiu.
Nun yera agradable pa la mio oreya sintir aquel instrumentu infernal, multiplicáu poles decenes d’agrupaciones que se xuntaben esi día naquel pueblu.

Daqué manera cola música yá tenía y andaba peles cais del mio pueblu aporreando tambores de xuguete.

Pocu más tarde, salió un anunciu nel periódicu d’un rapaz que se llamaba José Ángel Hevia, que ponía clase de gaita nel Polideportivu d’Oñón en Mieres.
La nuestra vecina Aurora baxó a avisar a casa de tal artículu y los mios pas nun lo pensaron muncho y apuntáronme. Ehí entamó too, paez ser que me gustó….

– El to percorríu musical ye tempranu y bayurosu… ¿Pues facenos un resumín?

Llevando un añu cola gaita y compaxinando los estudios na Escuela Municipal de Música, entamé cola Banda Gaites Mieres del Camín debutando nún de los díes grandes de les fiestes de S. Xuan. Los nervios de punta….

Con aquella banda y otres cuatro, formóse la Bandona d’Asturies, col Mayestru Hevia al mandu. Un centenar de músicos que pasaren a ser collacios hasta día de güei.
Daquella viaxábase muncho y conocíase mundu. Lo más gordo llegó col boom del “Busindre reel”. Conocí países enxamás imaxinaos.

Años dempués, cola conocencia más fondera de la música na que taba metíu, escuchaba grupos del Arcu Atlánticu y prestábenme dellos instrumentos. Foi cuando decidí qu’en llugar del clarinete, gustábame más la flauta travesera pa esti tipu de música y acabé faciendo el Grau Profesional nel conservatoriu. Dempués intereseme pola flauta de maera, que yera la que más s’averaba a la nuestra música. Con ello fui enredando con más instrumentos y conociendo xente, acabé siendo parte de delles formaciones folk del momentu. Colos años fui esplorando nos concursos pa gaiteros solistes, de bande de gaites, de grupos folk, collaborando nuna montonera discos, conciertos con dellos grupos y colocando dalgún premiu na estantería.
Esti añu COVID col refalfiu de la poca actividá, torné al conservatoriu a facer el Grau Profesional pola especialidá de gaita.

– De los tos trabayos músicales, ¿cual recuerdes con más ciñu?

Pienso que toos son especiales. Nun dexen de date oportunidaes, esperiencia y madurez musical y personal.
Cada proyeutu tien el so estilu y tocando instrumentos diferentes en caún, vas garrando’l to sitiu, el to estilu y dando forma y aportando’l soníu adecuáu al grupu.

– ¿El to tema favoritu?

Tengo munchos temes favoritos, pero’l qu’escoyí pa siempre como favoritu, dende’l mes d’agostu de 2012, ye “La Viquina” del discu Salia de Corquiéu. Quiciabes nun soi nin oxetivu, nin orixinal por ser ún de los grupos onde toco y col que más vínculu tengo, por nun salime del estilu musical, nin por nun dexar que seya d’otru llau que nun seya Asturies, pero dende la marcha del nuestru collaciu “Puru”, téngolu como l’himnu de la mio vida.

– ¿Con que músicu/grupu te prestaría collaborar?

Hubo un tiempu en que suañaba con collaborar con xente que consideraba ídolos. Creo que col pasu los años acabé tocando con tolos que me rondaben pela tiesta. Esti añu, aún siendo telemáticamente, creo que llegué a lo cimero. Compartí pantalla col gran flautista Michael McGoldrick. Dalguien a quien escucho dende cuasique los anicios de la mio formación. Nun vídeu en tríu xunto col mio collaciu Luis Nicolás al que tamién almiro, que creo que trabayamos bien, con muncha aceptación pa los que lu esfrutaron y con un amiestu de temes nos qu’ún d’ellos ta fechu pol mio compañeru de Corquiéu, Rigu y que Michael grabó nun de los sos discos.
La conversación vía whatsapp con él col mio inglés chabacano, tamién foi bastante fructífera (rises).

– ¿Qué mensaxe daries a un rapacín qu’entama a entrar nel mundiu de la música n’Asturies?

Que lo garre con ilusión y compromisu. De lo cabero andamos un poco faltos nesta dómina.

La música ye la llingua universal y pue llegase a cualisquier sitiu con ella.
Pue dar munches satisfacciones a lo llargo d’una carrera constante, perseverante y honesta.

– ¿Cómo sientes qu’Internet camudó’l negociu de la música?

Internet ye anguaño la ferramienta por escelencia. Universal, a vegaes gratuíta y de fácil alcance. Bien ye cierto que con ello y la creación de les plataformes dixitales y redes sociales qu’esisten pa vender y promocionar un productu musical, foron a la quiebra les discográfiques y con ello bien ceo, el formatu físicu, salvo pa los románticos a los que tovía nos gusta coleccionar discos.
Supongo que tendrá los sos pros y los sos contras, pero garró tantu pesu esta forma de promoción, que nun creo qu’haiga vuelta atrás.
Renovase o morrer.

– ¿Y l’andanciu? ¿Cómu ves la recuperación post covid, musicalmente falando?

Venimos d’un añu ensin eventos y paez ser qu’escampla l’actividá a poquitinos. Cuntaba fai unos meses nuna entrevista a un periódicu, que tán mui bien les ayudes económiques dende l’alministración pa sostener el parón, pero nun hai mayor motivación pa un artista, que facer llegar la to forma de ver la música, el to sentimientu, en definitiva el to trabayu, a un públicu agradecíu dende l’escenariu.
Sentise realizáu y ver que faes llabor, social, cultural y económica. Esti parón había de ser un puntu d’inflexón pa dar un poco cuenta de que necesitamos puxu y qu’ensin música en direutu nun se puede vivir.

– Si pudieres cambiar daqué del entornu musical n’Asturies, ¿Qué sedría? ¿Más conciertos, más sales, más sofitos a los artistes, más artistes cientraos no asturiano… qué camudaríes?

Pémeque too en xeneral. Dende les redes sigo artistes y grupos d’otros países del Arcu Atlánticu, onde se palpa una dinámica de trabayu con un circuitu de conciertos, xires y sobretoo ayuda dende arriba, ablucante. Nestos países valoren al músicu como un trabayador más. Remítome a la entruga anterior, equí fai falta munchu más apoyu nesi sentíu.

– Finalmente, mirando al futuru, ¿Qué proyeutos tienes o en qué tas trabayando?

Ensin desvinculame de la docencia d’instrumentos y de los grupos a los que pertenezo dende fai años, gustábame dar un pasu más y aportar cola carrera en solitariu. Toi afondando nos temes del que sedrá’l mio futuru discu.

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies