Riesgos nel proyeutu de central en Salime

  • 20 Agostu, 2021

La Coordinadora Ecoloxista d’Asturies considera que’l proyeutu de central Hidrollétrica reversible de Salime constitúi un riesgu que puede afeutar a los conceyos de Pezós, Ayande y Grandas de Salime

El proyeutu pretende crear una central hidrollétrica reversible basá na infracadarma esistente del saltu hidrollétricu de Salime, el mayor banzáu de Asturies con una superficie de 685 hectárees (ente los términos municipales de Grandas de Salime, Ayande y Ibias, n’Asturies, y de Negueira de Muñiz y Fonsagrada, en Llugo, Galicia) y destináu al aprovechamientu hidrolléctricu, anguañu con una potencia total de 160 MW .

Les nueves istalaciones a costruyir seríen una balsa cimera de 6,48 hm3 sobro materiales sueltos con panal impermeable de tipu asfálticu al nordés del pueblu de Buspol y aprosimao a 2 km al este del Banzáu de Salime, una toma d’agua nel Banzáu de Salime a unos 250 metros enagües enriba’l banzáu, circuitos hidráulicos d’alta y baxa presión executaos en galeríes, subestación, casa de máquines y tresformadores soterraños, y llínea llétrica aérea de 400 kV de 2,67 km hasta la subestación  de Pezós al otru llau del banzáu.

La nueva balsa cimera considérase gran banzáu, tanto pol so tamañu como pol riesgu potencial que pueda derivase del so posible frayatu o funcionamientu incorrechu, considerando la so afección a les llocalidaes de La Figuerina, Buslavín, la Mesa y Buspol y la carretera AS-14 (que conecta les capitales de concejo Grandas de Salime y La Puela Ayande). Dende la CEA sollerten de qu’el so allugamientu pertenez a una zona con “Susceptibilidá bien alta” a grandes movimientos en masa y a deslizamientos superficiales.

Sicasí, el proyeutu retarda l’analís d’estos riesgos, coles mesmes qu’evita sometese al plan d’Evaluación Ambiental Estratéxica.

Amás, recuerden dende la Coordinadora, la construción de preses y cálceres supon xuna alteración crítica de la dinámica y ecoloxía de los ríos lo mesmo que de les zones costeres. En concretu los banzaos, especialmente los grandes como ye’l de Salime, tienden a concentrar numberosos contaminantes y especies invasores, suponiendo tamién un gran riesgu de caráctr ecolóxicu.

 

Redaición InfoAsturies

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies