Abiertu’l plazu d’iscripción pa la “Traveserina”, actividá que culmina les actividaes braniegues pa mocedá y reciella de l’Agrupación Montañera Astur Torrecerredo n’Asturies
Dirixía a rapacinos d’ente 10 y 14 años, con calter xeneral, y de magar los 8 pa los participantes nel Programa de la Escuela de Montaña de la AMA Torrecerredo, la Traveserina ye una oportunidá perfecha pa que la reciella s’anicie na montaña ensin pelligros y con munchos conocimientos a la so dimposición.
Esta actividá remata el ciclu añal de la Escuela de Montaña, qu’inclui programes comu “Conoz Asturies” y “Conoz Xixón” empobinaos a la reciella y mocedá. El clú vien de finar los sos campamentos de branu nel so refuxu en La Raya, onde más de mediu cententar de rapacinos s’averaron non solo a la montaña, sinón a la espeleoloxía, la escalada, la cartografía, la fauna, flora, xeoloxía y hestoria d’Asturies.
Pa los que son un pocu mayorinos, tuvo llugar la Travesía la Cordillera, na que percorrieron el Cordal demientres cuasi dos selmanes, anuechando en tiendes de campaña o en refuxos, una esperiencia tresformadora pa mocedá de magar los 15 años. La Traveserina vien a ser el pasu previu o d’aniciación pa La Cordillera y nesta actividá, comu en toles que plantega AMA Torrecerredo, ufren una alternativa más fuerte y otra más suave en función del nivel de ca participante.
Les etapes, camudables en función de la condición física y a la meteoroloxía, entamen con prautiques d’acampada en Xixón el llunes 30, pa salir darréu camín de Ventaniella, onde entamará un percorríu de cuatro díes con final en Sorfoz.
Amás de les actividaes per Asturies, Torrecerredo entama una Travesía per Sierra Nevada, qu’entamará la selmana qu’entra.
Col envís de poder desendolcar de manera segura estes actividaes en tiempu d’andanciu, l’AMA Torrecerredo cuenta con un pricurosu ya estrictu protocolu de prevención que-y vien permitiendo desendolcar les sos actividaes con ceru incidencies.
This work is licensed under a Creative Commons Attribution 4.0 International License.
