El CSOA Llar El Mataderu lleva 7 años faciendo actividaes sociales, culturales y d’arruelu abiertes a tola población , de manera autoxestionada, y anuncien que van seguir faciéndoles, pesi a la confirmación del alcalde de Sieru de que la decisión de tirar l’edificiu ye firme y que yá tá fecha la llicitación.

La corporación municipal persabe que vive xente nel edificiu, pero abulta prioritario finar con un espaciu autoxestionáu y acabar con espacios y movimientos que-yos escuecen, “porque a les instituciones nun-yos presta l’autoxestión, ven pelligroso tolo que s’escapa al so control”

Asina les coses, tan dimpuestos a gastar 400.000 euros n’acabar con El Mataderu, pesi a tener un presupuestu cero pa ayudes direutes a les families necesitaes -pente otres munches necesidaes del conceyu-. Esi ye’l castigu por facer actividaes diferentes, por xenerar espacios d’alcuentru y fomentar l’espíritu críticu, siempres al marxe de les instituciones formales, de les que dende El Mataderu opinen que “piensen más n’especular y nel so beneficiu propiu que na vecindá.

Poro,  dende’l cientru social piden participación nes sos actividaes y movilizaciones, como mediu de presión pa frenar el so baltu.