El Festival de Cortometraxes Live Action cellebraráse del 19 al 22 de agosto na plataforma Festhome TV
El Festival de Curtiumetraxes “Live Action” lleva ocho años tratando de dar visibilidá a la cultura alternativa dientro’l mundu audiovisual y abrir camín amosando les nueves vanguardies y afayando ceadores innovadores.
Dende 2014 el “Live Action” esforcióse por faer llegar estes obres tantu a aficionaos como a un públicu más xeneralista, al empar que trató de sacar a rellucir el talentu audiovisual del país.
Coles mires de ayudar más especificamente a los mozos creadores asturianos, anguaño creáronse dos iniciatives. De primeres, una sección esclusiva para los curtiumetraxes producíos n’Asturies o por ceadores asturianos, dotándolos de mayor visibilidá.
Según Saúl Parra, un de los organizadores del festival “El nivel de los creadores asturianos anguañu ye peraltu, tamos bien sosprendíos. Non solo los sos curtiumetraxes tán perbién executaos, sinón que falen de manera intelixente sobro temes sociales actuales: feminismu, derechos LGTBIQ+, adiciones…”
De segundes, un ciclu de charres de bien estremaos perfiles que dexen conocer meyor la industria a la xente que ta intentando entrar nella.
Van cuntar con ponentes como los Hermanos Junquera, direutores del estudiu d’animación Angry Metal allugáu en Xixón, que trabayó en numberoses producciones internacionales, o Marta Lallana, directora del llargumetraxe Güeyos negros y del videoclip del cantar “Rambalín” de Rodrigo Cuevas.
Amás, pa Patricia Guerra “Dimos un pasu adelantre bien importante. Nun esfuerzu por reivindicar el papel de la muyer nel audiovisual tratóse de que les charres seyan paritaries y haiga’l mesmu númberu de ponencies de muyeres que d’homes. Éstes van tar centraes nel so trabayu como profesionales pa poner en valor la so perspeutiva y dotar de referentes a otres muyeres que quieran entrar na industria.”
Les charres van poder vese en diferíu mientres tola duración del festival. L’eventu va cellebrase del 19 al 22 d’agostu na plataforma Festhome TV. Pueden consultase les estayes y alquirise les entraes nel siguiente enllaz:
https://tv.festhome.com/festivaltv/certame-de-curtiumetraxes-live-action-cometcon .
Redaición InfoAsturies
This work is licensed under a Creative Commons Attribution 4.0 International License.
