• Portada
  • >
  • Sociedá/Llaboral
  • >
  • Desixen a la Ministra de Trabayu que cumpla les promeses de Podemos y derogue la reforma llaboral del 2012

Desixen a la Ministra de Trabayu que cumpla les promeses de Podemos y derogue la reforma llaboral del 2012

  • 18 Xunetu, 2021

Aprofitando la presencia en Xixón de la Ministra de Trabayu Podemita, Yolanda Díaz, CSI y CNT convocaron una manifestación na que se-y desixó el cumplimientu de les sos promeses elleutorales, procediendo a derogar darréu la reforma llaboral que carecemos de magar l’añu 2012

Esta reforma, aprebada pol PP, incluyía cuestiones comu l’abaratamientu de los despidos, flesibilización de los EREs, posibilitación de despidos de calter coleutivu de personal llaboral n’alministraciones ya empreses públiques, endurecimientu de la conversión de contratos temporales a indefinios y un llargu etcétera de midies que llevaron a la precarización más completa del mercáu llaboral.
Depués de media llexisllatura del gobiernu PSOE-Podemos-IU continúa vixente, pesi a qu’estos partíos llevaben la so derogación comu un de los puntos cimeros ya urxentes del so programa elleutoral.
Dende la CNT y la Corriente Sindical de Izquierda remembraron a la ministra que “ca día que pasa  prodúcense EREs, despidos y situaciones d’abusu que tienen como garante l’actual llexisllación” y afirmen sentise fondamente deceicionaos al comprebar que’l partíu que prometió un cambiu radical a favor de los trabayaores se conforma con plantegar  manifestaciones xenériques comu “favorecer la integración de los xóvenes nel mercáu de trabayu con condiciones dignes” o “favorecer midies que promuevan la igualdá llaboral ente homes y muyeres nel mercáu llaboral”, ensin especificar pa ello cuestiones concretes nin derogar les durisimes condiciones aprebaes na cabera reforma. “Nun modifiquen aspeutos básicos de la reforma llaboral y nun faen frente a la problemática más acuciante de los trabayos: garantizar un emplegu estable, de calidá y seguru” declaren dende la CSI.
Dende Andecha Astur, partíu que sofitó y participó na manifestación, apuntaron non solo al gobiernu español sinon a los sindicatos UGT y CCOO, comu cómplices, declarando que “España nun tien un gobiernu de socialistes y comunistes, tien otru gobiernu español más, neolliberal tamién, que se pliega comu los demás a los dictaos del mercáu y el capital. Mentantu, los sindicatos del sistema (UGT, CCOO) callen, asumiendo’l so papel de cómplices”.
Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies