• Portada
  • >
  • Sociedá/Llaboral
  • >
  • Andecha Astur pidi la dimisión de la Dellegá’l Gobiernu n’Asturies, Delia Llosa Carballido, pola inxustificada represión a los sindicalistes deteníos de la CNT

Andecha Astur pidi la dimisión de la Dellegá’l Gobiernu n’Asturies, Delia Llosa Carballido, pola inxustificada represión a los sindicalistes deteníos de la CNT

  • 25 Xunu, 2021

Los 7 sindicalistes condergaos a 3’5 años de cárcele y a 150.000 € de multa por denunciar l’acosu sesual ya esplotación llaboral a una trabayaora na Pastelería La Suiza, en Xixón, amuesen de que llau ta la “xusticia” española y non, nun ye del llau de les muyeres trabayaores

Dientro la llarga hestoria de la represión de la llucha obrera, la detención d’estos siete activistes, marca otru fitu llamentable. Les aiciones sindicales contra l’empresariu de la Pastelería La Suiza, acusáu d’acosu continuáu ya esplotación llaboral de la so emplegada, foron exemplares pola so contundencia, continuidá y coherencia, siendo al tiempu destacables por nun se producir nelles dengún altercáu o estroza.

Sicasí, resalten dende Andecha Astur  “a la Dellegación del Gobiernu español-y paeció que se cruciare la raya que separta’l sindicalismu apesebráu y consentíu d’aquel que da la cara y se compromete na defensa l’obreru escontra’l capital” y, per aciu la fiscalía y del maxistráu-xuez Lino Rubio Mayo, de sonadía pola so zuna contra la clas obrera, “acaben de fabricar una sentencia exemplarizante”.

Andecha Astur denuncia esta sentencia comu un artificiu llegal, nel que col sofitu de policía y fiscalía, fabricóse ex profeso un escenariu inculpaor destináu a represaliar l’acción sindical y la defensa de los drechos de los trabayaores.  Nel so comunicáu amuésense solidarios colos 7 compañeros represaliaos de la CNT y cola so organización sindical y desixen qu’istancies xudiciales superiores igüen esti casu de persecución de trabayaores por participar n’aiciones llícites de defensa.  Responsabilicen d’esti ataque direutu a la clas trabayaora al xuez sentenciaor, pero apunten tamién a la Dellegación del Gobiernu español, “cuyos deseyos de sentencia vengatible supo interpretar tan bien el señor Rubio Mayo”.

Considerando que la sentencia ye ún de los mayores ataques sofríos pol movimientu obreru asturianu nos caberos años, Andecha Astur desixe la dimisión de Delia Losa Carballido comu Dellegá del Gobiernu español n’Asturies.

La dellegada cuenta con un curriculum destacable al que pon dignu remata con esta aición de represión inxustificada de la llucha sindical: fía d’un alcalde-capo de les cuenques mineres, muyer d’un militar español, abogá del gabinete xurídicu del grupu parllamentariu del PSOE nel Congresu español, Secretaria de Rellaciones Istitucionales nel gobiernu de Pedro de Silva, Xefa de la Xunidá Xurídica de Farmacia y d’Ispeición de Centros y Sirvicios Sanitarios del gobiernu PSOE n’Asturies, Secretaria de Política Istitucional de l’AMSO, integrante del comité federal del PSOE, vocal de la Comisión d’Ética y Garantíes del PSOE y, sobro too, cabezalera de la plataforma de sofitu a Pedro Sánchez na llucha pola Secretaría Xeneral del PSOE, siendo ésti motivu caberu’l principal de que-y tocare comu premiu’l cargu de Dellegá del Gobiernu español n’Asturies.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies