• Portada
  • >
  • Cultura
  • >
  • Arranca musicasturiana.com, la páxina web especializada na escena de la música asturiana

Arranca musicasturiana.com, la páxina web especializada na escena de la música asturiana

  • 24 Xunu, 2021

Musicasturiana.com reconviértese nel mayor portal dixital dedicáu a la música asturiana.La tienda online amplía les sos xeres y agora ye tamién un diariu dixital, una guía de recursos y un archivu históricu 

La escena de la música n’asturianu yá tien la so páxina web especializada. Noticies, tienda online, Archivu de la Música Contemporánea Asturiana (AMCA), guía de recursos, conteníos audiovisuales, entrevistes, opinión, axenda d’eventos… Son dalgunes de les nueves xeres que desendolca musicasturiana.com, proyectu que nació a finales de 2017 como tienda online y distribuidora dixital y qu’agora da un pasu alantre ampliando’l so llabor.

El coordinador del proyectu, el periodista y xestor cultural Xicu Ariza, y el responsable del Archivu de la Música Contemporánea Asturiana (AMCA), el músicu y productor discográficu, Xune Elipe; van dar una rueda de prensa’l próximu miércoles 30 de xunu a les 12 hores nes oficines de musicasturiana.com en Xixón (c/ La Estrella nº1 Baxu Izquierda). Nella van presentar fondamente tolos detalles d’esta iniciativa pionera n’Asturies.

La nueva web asoleyó’l pasáu sábadu 19 y, anque tovía ta en fase prebes y hai conteníu por xubir, yá recueye dellos de los pegoyos d’esti proyectu. Hai noticies de la escena musical n’asturianu de los últimos meses; entrevistes, reportaxes y artículos d’opinión esbillaos de delles ediciones del Anuariu de la Música Asturiana y del llibru Rockmería; axenda de conciertos; guía con información de dellos artistes; y conteníos audiovisuales como los conciertos d’Amosando, los podcast del programa de la RPA sobre música asturiana Al Son, o delles playlists de Spotify. Tol conteníu publicáu hasta’l momentu reflexa la diversidá estilística qu’existe anguaño dientro de la música asturiana.

Destaca tamién el material del Archivu de la Música Contemporánea Asturiana (AMCA), ún de los pegoyos d’esti nuevu proyectu. Nél, hai una Sonoteca con información de los llanzamientos asoleyaos en 2021, una Hemeroteca con dellos Anuarios de la Música Asturiana dixitalizaos, y la estaya de Inéditos la inaugura una grabación nel Teatru Campoamor del conciertu 30 Aniversariu de Conceyu Bable que nun viera la lluz.

Nuevu Amosando

Amás del llanzamientu de la web, esti fin de selmana musicasturiana.com tamién publicó’l primer videu de la edición 2021 d’Amosando, el ciclu de presentaciones de discos en formatu íntimu qu’organiza. Nesta ocasión actuó Carlos Rubiera en compañía de Mariluz Cristóbal Caunedo, dos históricos de la canción asturiana que xuntos presentaron ‘30 Asturianaes’, la gran obra del músicu xixonés formada por un llibru y 3 CDs.


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies