La Sociedá Estatal de Participaciones Industriales (SEPI), aprebó a finales de marzu una ayuda de 120 millones d’euros pa Duro Felguera, condicionaos a la esistencia d’un inversor. Énte la rocea xeneralizada escontra esta empresa, dengún inversor priváu quixo asumir el riesgu y foi el “Principado” quien comprometió 6 millones de fondos públicos pa sacar alantre a esta empresa privada, ensin llograr a cambéu nenguna garantía de continuidá.
Pa optar a eses ayudes, la empresa presentó un plan estratéxicu que xiraba en redol a la fabricación y l’apueste pola modernización de procesos.
Trés meses dempués de concedese l’ayuda y más d’un mes dempués de que s’ingresaren los primeros fondos públicos, los trabayadores del Tallerón ven nel aire los sos emplegos y denuncien que la empresa nun ta cumpliendo esti plan, nun hai interés por atopar contratos, nun hai movimientos de renovación de les istalaciones y la voluntá de diálogu qu’amuesen cola plantiya ye nula.
Los trabayadores de Duro Felguera Calderería Pesada consideren que la inyeción pública nes arques de la empresa tendría de repercutir direutamente na sociedá asturiana. “La nuesa obligación moral ye desixir que se cumpla’l plan estratéxicu y qu’haiga una apuesta seria pola industria y pol futuru d’Asturies”.
Pa ello defenden como ferramienta’l conveniu colectivu, un conveniu que xire en trés pivoses: la modernización de procesos, l’aumentu de plantiya y la recuperación salarial. Énte la indiferencia de la empresa, que nun paez interesada en destinar esos millones d’euros públicos a apostar pol futuru industrial, los sos trabayadores convocaron una selmana de fuelgues y una serie de concentraciones nes que reclamen que les ayudes públiques repercutan na reactivación de la sociedá asturiana y non n’engrosar cuentes privaes.
La primer concentración va tener llugar na puerta del Tallerón mañana martes 22 de 11:30 a 12.30.