La Plataforma de Trabayadores de Centros de Día y CRAD d’Asturies denuncien l’actitú pasiva de la Conseyería de Drechos Sociales y Bientar de Asturies con respectu al siguimientu de les empreses contrataes pa la xestión de los Centros de Día dependientes de so

Acordies los sos emplegaos, les empreses contrataes pal serviciu d’atención de persones dependientes nos Centros de Día incumplen sistemática y deliberadamente les condiciones de los contratos roblaos cola alministración.
Les consecuencies d’estos incumplimientos, denuncien, recayen directamente sobro los usuarios d’estos servicios, yá que al nun cubrise les baxes, escedencies nin vacaciones, la so atención ye deficitaria. Informen de qu’en munchos casos escarecen d’asistencia direuta de sicólogos, terapeutes y Téunicos en cuiriaos d’ausiliar d’enfermería, puestos desixíos pola Alministración nos sos contratos, derivando escontra’l restu del personal -ensin especializar- dicha atención, amontando la so carga de trabayu con funciones pa les que nun recibieron la formación necesario.
La baxa ocupación de los centros de día (tán al 75%) nun ye abondo pa compensar la dificultá de los nuevos protocolos d’atención, con grupos burbuxa y estremando el precuru na aplicación de les midíes de seguridá sanitaria.
Munches d’estes empreses, contrataes pola Conseyería de Drechos Sociales y Bientar, son  multiservicios, non específicamente especializaes n’atención a les persones mayores, polo que dende’l entamu taba nidio que la calidá asistencial diba ser la mínima, pero lo qu’esmolez a les trabayadores ye lo que llamen “el plan d’aforru empresarial” lleváu a cabu por estes empreses, sacrificando l’asistencia al usuariu  col beneplácitu de l’Alministración.
Reclamen poro a la Conseyería l’apertura d’un procesu d’investigación, internu y esternu, pa desixir el cumplimientu estrictu de los deberes empresariales ensin amenorgar la calidá asistencial a los usuarios.

Llucía F. Marqués