“Con humor y gracia puedes facer que dalguién con una mentalidá d’otra época, o con privilexos y actitúes marcaes pol xéneru, la identidá y la clas, pare un ratín a pensar”

Aymara González Montoto (Llanes, 1994) convertíase va unos díes na primer autora n’algamar el Premiu de Monólogos Pepe Campo col so testu ‘Somos unes repunantes’. Inquieta por naturaleza, apasionada de la pallabra y buscaora incansable del conocimientu, Aymara ye traductora, intérprete y llicenciada en Romániques y Traducción ya Interpretación pola Universidá de Salamanca, tando especializada’n llingües minoritaries.

Collabora davezu coles revistes La Sidra y SALÚdable, teniendo tamién asoleyaos testos en Formientu.com, y tien collaborao con instituciones catalanes como’l Departament de Cultura de la Generalitat, el CIEMEN y el Institut Ramon Llull tanto en formaciones como n’eventos de calter internacional, amásde xestionar la cuenta de bookstagram @llardellibros. Ta trabayando na torna de dellos clásicos al asturianu y tien asoleyaos dalgunos testos en Formientu.com, tou ello compaxináo colos sos estudios de máster en Formación del Profesoráu n’Asturianu.

• Vienes de recibir el premiu Pepe Campo de monólogu. ¿Cómu te fae sentir?

Ye un afalagu mui grande, másime porque ye un xéneru que nun avezo consumir nin prauticar, pero l’esfuerzu vien premiáu. El ganar tamién fai que piense en siguir escribiendo, con más seguridá y más puxu qu’enantes. Los premios lleven apareyáu el valir propio de la producción, ¡asina que toca siguir! Porque si’l mio testu fai que dalguién lo pase bien, que s’entretenga, que ría, compensa toles esmoliciones y les dubies personales que surden nel procesu.

• El ganador foi un monólogu con un fuerte conteníu revindicativu, cuasique didácticu ¿Consideres que l’humor ye una bona vía pa esparder idegues?

Ensin dubia dala. Ye mui importante ver que, en según qué ámbitos, hai que siguir un procesu cuásique pedagóxicu, y l’humor ye siempre l’averamientu más bonal. Con humor y gracia puedes facer que dalguién con una mentalidá d’otra época, o con privilexos y actitúes marcaes pol xéneru, la identidá y la clas, pare un ratín a pensar. La risa ye catártica y, si queda posu, puedes seguir trabayando na deconstrucción y na reeducación.

• El monólogu falaba de feminismu y tu yes la primer muyer en ganar esti premiu ¿Casualidá? ¿Hai falta de mayor presencia femenina nel campu’l monólogu asturianu?

El monólogu siempre tuvo unos personaxes y unos temes marcaos pol xéneru masculín, con un tipu d’humor de nueso, asturianu. ¿Y quién taba fuera casa? ¿Quién podía falar de temes más sensibles o delicaos y saber que nun diben marmuriar a escondíes?

El fechu de que ganara’l premiu creo que tien más que ver con que les muyeres escritores asturianes venimos, d’un tiempu a esta parte, decatándonos de qué espacios tenemos, a qué espacios queremos llegar y a qué reconocimientu aspiremos. Lo mesmo que na lliteratura a nivel universal. Faen falta munches muyeres, dientro y fuera del monólogu asturianu: na narrativa, nel ensayu, nel teatru y na poesía.

• ¿Trabayes dalgún otru xeneru, aparte’l monólogu?

Sí, de fechu siempre fui más de narrativa y dende fai años escribo un diariu, enantes más de xemes en cuando, agora tolos díes, pa desbloquiar el caudal narrativu. Igual da pa diarios de viaxes.

Cuando yera chica escribía los cuentos que me contaben per casa, les lleendes y les hestories que m’arrodiaben, inclusu intenté facer dalguna novela. Dempués tuve una temporada d’intentar la poesía. Agora, con más años, siento que yá fice posu coles llectures y les esperiencies; asina, puedo trabayar toos esos xéneros y formatos con un mínimu de garantía de satisfaición personal. Hai dellos rellatos y pruyeutos narrativos colgando, asina qu’espero tener más coses que compartir ceo.

• Nel ámbetu lliterariu en xeneral ya’l monólogu’n particular, ¿qué autores son la to ispiración?

Lleo casi tolo que pillo. Caberamente tiro pa la fantasía, la ciencia ficción y les distopíes (préstenme muncho Octavia Butler y Margaret Atwood). Nel ensayu y na narrativa autobiográfica lleo a les grandes feministes, bell hooks, Simone de Beauvoir, Annie Ernaux, Audre Lorde, Chimamanda Ngozi Adichie; tamién intento lleer lo que saquen los y les escritores milenial del estáu (Luna Miguel, Andrea Abreu, Elizabeth Duval). Y casi cada llibru escritu por xente griego o chipriota, o sobre la cultura helénica, yá seya sobre mitos o policiaca.

Nel ámbitu asturianu yá ye otru cantar. Lleolo too, con más interés lo qu’escriben les muyeres y la xente mozo, porque nos echo muncho en falta na lliteratura asturiana y nos premios. Y pal humor, non tantu pal monólogu en concretu, lleo muncho a Pepe Campo y les traducciones d’Astérix y Obélix.

• El xéneru monologuista decayó abondo n’Asturies, pero’l conceutu vieno de vuelta al traviés de los cómicos televisivos, vía tradición norteamericana. ¿Ves dalgún venceyu pente los modernos cómicos ya’l monologuista tradicional asturianu o son mui desemeyaos?

Les carauterístiques mínimes del monólogu creo que son básiques al marxe del apellíu xeográficu y llingüísticu, porque al ser una sola persona, parten de la esperiencia, ye la mesma monologuista quien sirve de suxetu pa la so chancia. Sicasí, el monólogu, lo mesmo que’l teatru n’asturianu, ta más asociáu a los temes y les perspeutives tradicionales y costumistes, como xéneru típicu y tradicional que ye.

Igual parte de la perda de puxu vien porque tenemos llercia de cortar filos de xunión cola tradición, como si eso ficiera que’l monólogu fuera a perder la so importancia, el so valir o el so públicu. Pero ¿qué facemos entós? Yo soi partidaria de fuxir p’alantre, ye preferible guetar nueves formes y espresiones que dexar morrer un xéneru porque’l so pesu hestóricu nun cuadra coles nueses motivaciones.

This work is licensed under a Creative Commons Attribution 4.0 International License.