Llucía F. Marqués

Cuando ya entamaba a perdese na memoria la mítica sentencia “la emigración de la mocedá ye una lleenda urbana”, que fizo famosa’l presidentísimu Vicente Álvarez Areces, el so dignu sucesor, el tamién presidente sociollistu Adrián Barbón, acuña otra frase con polo menos tanta coña comu la primera:

“Paez que les esnales d’Asturies tan abandonaes, pero ye tolo contrario”

Ahí, con un par; y tien el fégadu de soltalo en L.luarca, qu’un nun sabe porque nun-y llueven güevazos más a menudo a esti home.  Nun-y faltó más que dir a decilo al pie del argayu qu’incomunica’l surocidente, a la casa de los rapacinos ensin tresporte escolar o a les puertes del hospital de Xarrio, ya puestos.

Non, ho, abandonaes non. Escaecies quiciás. Aisllaes, denguneaes, desatendies, machucaes… pero abandonaes nun tan. De fechu tan aplicándose nelles polítiques bien planificaes, a décades vista, empobinaes a un fin mayor -que non meyor-, el de desagospiales dafechu. L’envís ye tornales nun gran ermu verdi, aglomerando la población na renomada “Aria Cientral Metropolitana”, onde ye más económico prestar servicios y más cenciello controlar a la población. De pasu finamos coles comunidaes qué más caltienen la identidá y cultura asturianes y rematamos formes de vida que llanten raigaños sieglos atrás. Asina, con un hábil movimientu de deu, finamos con otru pegoyu del país, “globalizamos” Asturies y aforramos en presupuestos, pa que los collacios de la rede clientelar política tengan más a repartir.

This work is licensed under a Creative Commons Attribution 4.0 International License.