Andecha Astur lleva al Parllamentu Européu la contaminación en Xixón

  • 9 Xunu, 2021

Responsabiliza al gobiernu del “Principado” y propón a la Comisión Europea una serie de midíes de control

L’europarllamentariu por Agora Repúbliques Pernando Barrena presentó a pidición d’Andecha Astur una riestra d’entrugues y aniciatives sobro la esmolecedora esmoleceora contaminación atmosférica que carez la ciudá de Xixón. Pernando, d’EH Bildu, representó  coles sos entrugues los intereses asturianos, al actuar al traviés de la coallición Agora Repúbliques, a la que pertenez tanto’l so partíu comu Andecha Astur.

Na so pidición Andecha Astur apurre información sobro la deficiente calidá del aire nel conceyu, acusa a Barbón y la FSA-PSOE de poner per delantre les cuentes de resultaos de les grandes empreses contaminantes enantes que garantizar la salú los asturianos y denuncia ente la Comisión Europea a la Casa Conceyu de Xixón y al Gobiernu asturianu, por ser frecuentemente acusaos d’ocultar datos ñegativos sobro la contaminación del aire na principal ciudá astur, tapeciendo los resultaos de dalguna estación de medición de la calidá l’aire.

En concreto, Xixón carez cuasi de contino niveles non permitíos de NO2, partícules PM10, PM2,5…, ensin que se tome dala midía por parte de la Casa Conceyu de Xixón ya’l Gobiernu asturianu. Un estudiu espublizáu hai un tiempu na revista «Journal Atmospheric Chemistry and Physics» inclui la ciudá de Xixón ente les más contaminaes d’Europa nel añu 2030, daqué que va camín en convertise nuna realidá.

Los nacionaliegos piden la Comisión Europea que se posicione sobro estos desaxeraos niveles de contaminación de Xixón (de los más altos del continente), qu’aperie mecanismos estraordinarios pa obligar a Cases Conceyu y a Gobiernos nacionales a espublizar los braeros datos de les sos estaciones de midición de la calidá l’aire, y, a lo cabero, qu’igüe una direutiva específica y urxente p’atayar el deterioru l’aire nes ciudaes que, comu Xixón, carecen los mayores niveles de contaminación atmosférico d’Europa.

Piden tamién a la Comisión Europea que determine si la rede d’estaciones de control de calidá l’aire qu’hai en Xixón ye o non abondo, si ye o non eficaz la so distribución territorial y si los parámetros de calidá de les estaciones son o non homologables. Asina mesmo soliciten a la Comisión Europea qu’evalúe los protocolos de la Casa Conceyu de Xixón y del Gobiernu asturianu pa situación de cris por contaminación del aire, controlando especialmente’l tratu preferente que nesos protocolos reciben les industries siderúrxiques asitiaes nel oeste la ciudá y les empreses graneleres qu’operen nel Puertu d’El Musel.

La calidá l’aire ye ún de los oxetivos prioritarios de la Xunión Europea na so aición nos caberos años, siendo asina que los grupos parllamentarios d’esquierdes llevaron al Parllamentu européu hai unos meses la desixencia d’una llexisllación más estricta en materia de polución atmosférico.

Nuria Prendes

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies