La situación creada arriendes del andaciu ta siendo llaceriosa a nivel de salú mental, cebándose especialmente ente los adolescentes
L’Asociación Española de Pediatría llanza una seria alerta mientres el so II Congresu Dixital, qu’enfrentó, ente otres temes, les graves consecuencies que la pandemia ta teniendo sobro la salú mental de los menores. La salú mental de la población xeneral viose notablemente mancao tanto pola pandemia en si como pola inseguridá creada y el dañu fechu poles midíes de contención a la socialización ya’l contactu humanu, daqué especialmente necesario na adolescencia.
Les patoloxíes que más medraron son los trestornos alimenticios, los rellacionaos cola ansiedá y los obsesivos, de los qu’alredor del 30% deriven en depresión. En total, les urxencies pediátriques por problemes siquiátricos aumentaron un 50 %, llegando a haber ingresaos nes unidaes de siquiatría infantil fasta cuatro vegaes más pacientes que la media anterior a la pandemia. Tocantes a los trestornos alimentarios, principalmente anoresia y nuna proporción muncho mayor ente moces, costátase una mayor severidá de los casos, yá que si anantes de la pandemia la perda de pesu atopábase ente’l 10 y el 15%, nos casos actuales envalórase una perda d’ente un 30 y un 35%, poniendo en riesgu la vida de les adolescentes que lo carecen. Los estudios costaten un seriu aumentu de les autollesiones non suicides y los espertos agoren un inminente repique de les conductes suicides, si nun s’atienden afayaizamente les anteriores patoloxíes. Recordemos que yá anguañu’l suicidiu ye la segunda causa de muerte ente menores de 21 años.
Énte esta realidá llamen a poner darréu en marcha midíes p’amenorgar l’impactu sicolóxicu de la pandemia en neños y adolescentes, destacando la necesidá d’ameyorar los servicios de siquiatría, sicoloxía y salú mental yasina comu l’importante collaboración de padres y docentes a la de detectar a tiempu los síntomes nos menores. Amás, consideren importante garantizar que tolos neños entamen el cursu que vienen de forma presencial, fomentándose les actividaes extraescolares y l’exerciciu físicu. Aprebar ya implementar la llei del suicidiu con apartaos específicos pa esta población y reconocer la especialidá de siquiatría de neños y adolescentse -l’Estáu español ye l’únicu de la UE que nun la tien- son otres de les reivindicaciones d’esti colectivu.
Llucía F. Marqués
This work is licensed under a Creative Commons Attribution 4.0 International License.
